ម្ដាយ និងកូន
លោកស្រីវេជ្ជបណ្ឌិត Joan Luby ដែលជាអ្នកដឹកនាំការស្រាវជ្រាវនេះ បានថ្លែងថា ការរកឃើញដ៏សំខាន់នេះ គឺជាបទពិសោធន៍ថ្មីមួយសម្រាប់ឲ្យម្ដាយឪពុកទាំងឡាយ យកចិត្តមើលថែរក្សាបុត្រធីតារបស់ខ្លួនប្រកបដោយសេចក្ដីស្រលាញ់ ដើម្បីជួយដល់ការវិវឌ្ឍនៃខួរក្បាលរបស់ពួកគេ។
តាមពិតទៅម្ដាយឪពុកណាក៏ស្រលាញ់កូននោះដែរ ប៉ុន្ដែការស្រលាញ់របស់ឪពុកម្ដាយខ្លះមិនបានបញ្ចេញមកក្រៅនោះទេ ដែលនេះហើយដែលធ្វើឲ្យកូនតូចៗមិនបានដឹង។
ដើម្បីរកឃើញពីទំនាក់ទំនងរវាងការផ្ដល់ភាពកក់របស់ឪពុកម្ដាយ ចំពោះកូន និងការវិវឌ្ឍខួរក្បាល ក្រុមអ្នកស្រាវជ្រាវបានធ្វើការបង្កើតនូវការសិក្សាមួយដែលមាន ការចូលរួមពីកុមារ ៩២នាក់ ដែលមានអាយុ៧ ទៅ១០ឆ្នាំ។ កុមារទាំងនោះត្រូវបានយកមកស្គែនខួរក្បាល ដើម្បីដឹងពីសមត្ថភាពនៃការគិតរបស់ពួកគេ។
ជាលទ្ធផលបានបង្ហាញថា ៤១ភាគរយនៃកុមារមានខួរក្បាលមិនសូវល្អ ខណៈដែលអ្នកដទៃទៀតមានខួរក្បាលដែលប្រកបដោយសុខភាពល្អ។ ការស្គែនខួរក្បាលនោះ ក៏បានបង្ហាញទៀតថា កុមារដែលទទួលអារម្មណ៍កក់ក្ដៅពីម្ដាយ មាន hippocampus ធំជាងកុមារដែលមិនសូវមានភាពកក់ក្ដៅពីម្ដាយដល់ទៅ ១០ភាគរយ។