ទឹកតែ
គួរបញ្ជាក់ផងដែរថា ទឹកតែគឺជាភេសជ្ជៈដែលមានប្រជាប្រិយភាពបំផុតលំដាប់ទីពីរនៅក្នុង លោក បន្ទាប់ពីទឹកធម្មតា។ ក្នុងតែ មានផ្ទុកទៅដោយសារធាតុប៉ូលីផេណុល ដែលជាសារធាតុប្រឆាំងអុកស៊ីតកម្ម ដែលអាចបញ្ឈប់ការរីកលូតលាស់នៃកោសិកាមហារីកបាន។ ក្រៅពីបន្ថយសម្ពាធឈាម និងការពារមហារីក ទឹកតែក៏អាចបង្កើនមុខងារនៃប្រព័ន្ធភាពស៊ាំផងដែរ បើយោងតាមការស្រាវជ្រាវមួយទៀតរបស់សាកលវិទ្យាល័យ Harvard។ បន្ថែមលើអត្ថប្រយោជន៍ដូចបានរៀបរាប់ខាងលើ ក្រុមអ្នកសា្រវជ្រាវបានរកឃើញភស្ដុតាងដែលបញ្ជាក់ថា ទឹកតែអាចថែរក្សាបេះដូងឲ្យមានសុខភាពល្អផងដែរ។
លោក Jonathan Hodgson ដែលជាអ្នកដឹកនាំការស្រាវជ្រាវថ្មីនេះ បានបញ្ជាក់ថា ទឹកតែត្រូវបានគេដឹងរួចមកហើយថា អាចមានប្រយោជន៍ចំពោះបេះដូង ប៉ុន្ដែការសិក្សាថ្មីនេះ បានរកឃើញថែមទៀតថា ទឹកតែអាចកាត់បន្ថយហានីភ័យនៃកត្តាដ៏ចម្បងដែលបង្កជាជំងឺបេះដូង នោះគឺការលើសឈាម។
នៅក្នុងការស្រាវជ្រាវនេះ គេបានធ្វើឡើងចំពោះជនជាតិអូស្រ្ដាលីដែលមានអាយុ ៣៥ទៅ ៧៥ឆ្នាំ។ ៦ខែក្រោយមក លទ្ធផលបានបង្ហាញថា អ្នកដែលផឹកតែ បានថយនូវសម្ពាធឈាមបានយ៉ាងប្រសើរ ពោលគឺចុះបាន ១០ភាគរយ។
ជាចុងក្រោយ ខ្មែរសារិកា សូមប្រាប់ពីវិធីការពារជំងឺលើសឈាមដ៏សាមញ្ញ និងមានប្រសិទ្ធភាព ដែលមានដូចជា កាត់ បន្ថយការញ៉ាំអាហារប្រៃពេក និងកាត់បន្ថយការញ៉ាំគ្រឿងស្រវឹង។ គួបផ្សំនឹងការកាត់បន្ថយពីរនេះ អ្នកក៏ត្រូវបង្កើនផងដែរ គឺបង្កើនការញ៉ាំបន្លែ និងផ្លែឈើឲ្យបានច្រើន បូករួមទាំងការហាត់ប្រាណជាប្រចាំ។