បុគ្គលិកដែលអង្គុយយូរៗនៅការិយាល័យ
ដើម្បីចេញជាលទ្ធផលនេះឡើង ក្រុមអ្នកស្រាវជ្រាវបានធ្វើការសាកសួរលើក្រុមអ្នកចូលរួមដែលជា បុគ្គលិកក្រុមហ៊ុនចំនួនជាង ១០០០នាក់ ចាប់ពីឆ្នាំ២០០៩ ដល់ឆ្នាំ២០១១។ ក្រោយពីធ្វើការវិភាគលើចម្លើយនៃក្រុមអ្នកចូលរួមទាំងនោះ បានបង្ហាញថា ៧០ភាគរយនៃអ្នកចូលរួម គឺមិនបានហាត់ប្រាណជាប្រចាំនោះទេ ហើយថែមទាំងចំណាយពេលជាច្រើនម៉ោងនៅអង្គុយកន្លែងការងារ ដោយមិនងើបទាល់តែសោះ។ អ្វីដែលគួរឲ្យព្រួយបារម្ភថែមទៀតនោះ គឺសូម្បីតែម៉ោងសម្រាក ក៏បុគ្គលិកទាំងនោះនៅអង្គុយដែរ ពោលគឺអង្គុយញ៉ាំអី រួចហើយអង្គុយនិយាយគ្នាលេងជាមួយបុគ្គលិកដូចគ្នា រហូតដល់ម៉ោងធ្វើការដែលត្រូវអង្គុយតទៅទៀត។
ក្រុមបុគ្គលិកដែលអង្គុយរយៈពេលយូរៗនោះ ត្រូវបានគេរកឃើញថា មានហានីភ័យខ្ពស់ក្នុងការជួបនូវបញ្ហាសុខភាព ទាំងផ្លូវកាយ និងផ្លូវចិត្ត។
ក្រុមអ្នកស្រាវជ្រាវបានបន្ថែមទៀតថា ក្រោយពេលដែលត្រូវអង្គុយធ្វើការរាប់ម៉ោងហើយនោះ ពួកគេបានអង្គុយមើលទូរទស្សន៍ រួចគេងរាប់ម៉ោងថែមទៀតនាពេលយប់ ដែលនេះមានន័យថា រាងកាយស្ទើតែគ្មានការហាត់ប្រាណទាល់តែសោះ។
លោកវេជ្ជបណ្ឌិត Myanna Duncan មកពីសាកលវិទ្យាល័យ Loughborough នៃចក្រភពអង់គ្លេសបាននិយាយថា មនុស្សភាគច្រើននាពេលបច្ចុប្បន្ននេះបាននាំគ្នាភ្លេចក្រោកឈរ នៅពេលកំពុងធ្វើការ។ ពួកគេទាក់ទងជាមួយបុគ្គលិកដទៃទៀតតាមរយៈអ៊ីនធើណិត ដូច្នេះមិនចាំបាច់ក្រោកឈរដើរទៅនិយាយទល់មុខជាមួយម្នាក់ផ្សេងទៀត នោះទេ។
បានអានអត្ថបទនេះហើយ សង្ឃឹមថាប្រិយមិត្តដែលអង្គុយធ្វើការយូរៗ អាចងើបឈរបានខ្លះនៅពេលកំពុងធ្វើការ ដើម្បីសុខភាពដ៏ប្រសើររបស់យើង។