មាន
អ្នកដែលធាត់ៗជាច្រើន បានត្អូញត្អែរពីរូបរាងរបស់ខ្លួន
ដោយអ្នកខ្លះលើកឡើងថា ខំអត់បាយប៉ុណ្ណឹងហើយ នៅតែមិនស្គម
អ្នកខ្លះថា ញ៉ាំតិចៗណាស់ តែគីឡូនៅតែឡើង។
មូលហេតុដែលធ្វើឲ្យអ្នកមិនស្រកទម្ងន់
គឺដោយសារអ្នកខ្វះអ្វីម្យ៉ាងជាមិនខាន។
វិធីល្អបំផុតសម្រាប់សម្រកគីឡូ
គឺមិនមែនត្រឹមតែបង្អត់អាហារខ្លួនឯងនោះទេ
ពោលគឺការហាត់ប្រាណជាវិធីល្អបំផុតដែលមិនគួររំលងចោល។បើសិនជាអ្នកចង់ស្រកឲ្យកាន់តែប្រសើរទៀតនោះ គឺអ្នកមិនត្រូវចោលមួយណាឡើយ រវាងការញ៉ាំអាហារដែលត្រឹមត្រូវ និងការហាត់ប្រាណ។ ប្រសិនបើអ្នកអនុវត្តវិធីទាំងពីរនេះបាន អ្នកមិនចាំបាច់ចំណាយលុយទៅសម្រករាង នៅតាមហាង ឬទិញផលិតផលផ្សេងៗមកប្រើទាំងប្រថុយប្រថាននោះឡើយ។
ក្រុមអ្នកជំនាញរបស់សហរដ្ឋអាមេរិក ប្រចាំសាកលវិទ្យាល័យ Harvard University បានរកឃើញនូវរបកគំហើញថ្មីមួយ ដែលថា ការហាត់ប្រាណគឺជាវិធីដំបូងបំផុត សម្រាប់ជៀសចេញឲ្យឆ្ងាញពីការធាត់លើសទម្ងន់ ខណៈដែលវាមានទំនាក់ទំនងយ៉ាងជិតស្និទ្ធជាមួយនឹងអាហារដែលត្រឹម ត្រូវផងដែរ។
ដោយសារតែពីរវិធីនេះមានទំនាក់ទំនងគ្នាបែបនេះហើយ ទើបក្រុមអ្នកជំនាញបានផ្ដល់ជាដំបូន្មានថា មិនគួរចោលមួយណាឡើយ ព្រោះបើធ្វើបានទាំងពីរ គឺប្រសិទ្ធភាពនឹងកាន់តែខ្លាំង។
ចូរផ្លាស់ប្ដូរទម្លាប់ប្រចាំថ្ងៃរបស់អ្នក ដោយកែប្រែពីការអង្គុយនៅមុខកញ្ចក់ទូរទស្សន៍ ឬកុំព្យូទ័រ ហើយឆ្លៀតពេលមកហាត់ប្រាណនៅពេលណាមួយ ដូចជាពេលព្រឹកព្រលឹម ឬពេលល្ងាចនាថ្ងៃធ្វើការ និងថ្ងៃអាទិត្យដូចជាថ្ងៃនេះជាដើម អ្នកអាចរៀបចំពេលណាមួយដើម្បីបញ្ចេញញើសរបស់អ្នក ដូចជាទៅហែលទឹកនៅកន្លែងហាត់ប្រាណ ឬរត់នៅតាមផ្លូវជិតៗផ្ទះ ទៅរាំនៅស្ដាតអូឡាំពិត ឬនៅតាមសួនច្បារនានា។ មួយវិញទៀត ដែលអ្នកមិនគួរភ្លេច គឺមិនត្រូវញ៉ាំអ្វីទៅតាមចិត្តចង់នោះទេ។