យោង
តាមលទ្ធផលនៃស្រាវជ្រាវថ្មីមួយបានបង្ហាញថា
ការញ៉ាំសាច់ក្រកមួយកង់ក្នុងមួយថ្ងៃ
នឹងបង្កើនអាត្រាហានីភ័យនៃការកើតជំងឺមហារីកលំពែង ។ក្រុមអ្នកវិទ្យាសាស្រ្ដបានរកឃើញថា ការញ៉ាំសូម្បីតែបន្តិចណាមួយនៃសាច់ក្រក ឬសាច់កែឆ្នៃផ្សេងទៀតជារៀងរាល់ថ្ងៃ នឹងបង្កើនឱកាសនៃការវិវឌ្ឍទៅរកជំងឺដ៏សាហាវនេះ។
ជំងឺមហារីកលំពែងគឺជាជំងឺដែលគេឲ្យឈ្មោះថា ឃាតករដ៏ស្ងៀមស្ងាត់ ព្រោះវាមិនបានបង្ហាញរោគសញ្ញាណាមួយនៅដំណាក់កាលដំបូងនៃការកើតនោះ ទេ។
ទោះពីជាវាបានរាតត្បាតមកលើខ្លួនយើងខ្លាំងហើយក៏ដោយ ក៏រោគសញ្ញារបស់វាមិនមានអ្វីគួរឲ្យកត់សម្គាល់នោះទេ ពោលគឺត្រឹមឈឺខ្នង ឬស្រកទម្ងន់ប៉ុណ្ណោះ។
ភាគច្រើននៃអ្នកកើតជំងឺនេះគឺមិនអាចជួយបានទាន់ពេលវេលា ព្រោះវាយឺតពេលណាស់ទៅហើយនៅពេលដឹង ដោយហេតុនេះហើយ វាបានក្លាយជាជំងឺដែលមានអ្នកជាសះស្បើយតិចបំផុតក្នុងចំណោមជំងឺ មហារីកដទៃទៀត។ មិនត្រឹមតែប៉ុណ្ណោះទេ មានអ្នកជំងឺតែ៣ភាគរយប៉ុណ្ណោះ ដែលអាចរស់បានដល់៥ឆ្នាំ។
មូលហេតុដែលគេបានដឹងរួចមកហើយ រួមមានការជក់បារី ការញ៉ាំគ្រឿងស្រវេង និងការធាត់លើសទម្ងន់។ ប៉ុន្ដែការស្រាវជ្រាវចុងក្រោយដែលធ្វើឡើងដោយជនជាតិស៊ុយអែតនេះ បានបន្ថែមនូវហេតុផលថ្មីមួយទៀត គឺការញ៉ាំសាច់ក្រក ឬសាច់ឆ្នៃផ្សេងទៀត (ham, hot dog, bacon…)។ ការញ៉ាំត្រឹមតែ ៥០ក្រាម ក្នុងមួយថ្ងៃ នឹងបង្កើនគ្រោះថ្នាក់ដល់ទៅ ១៩ភាគរយ។
សរុបមកវិញ ចូរកាត់បន្ថយញ៉ាំសាច់ក្រក ឬសាច់ចញ្ច្រាំក្នុងប៊ើហ្គើជាដើម ព្រោះវានឹងអាចនាំអ្នកទៅរកជំងឺដ៏សាហាវគឺជំងឺមហារីកលំពែង។