កុមារ
ដែលចូលរួមក្នុងសកម្មភាពកីឡា ឬសកម្មភាពផ្នែករាងកាយដទៃទៀត
ត្រូវបានគេរកឃើញថា មានភាពប្រសើរក្នុងការរៀនសូត្រ
បើប្រៀបធៀបជាមួយកុមារដែលអសកម្មផ្នែករាងកាយ។លទ្ធផលនេះ ត្រូវបានរកឃើញដោយក្រុមអ្នកស្រាវជ្រាវជនជាតិហុល្លង់ ដែលបានធ្វើការវិភាគលើការសិក្សាចំនួន១៤ផ្សេងគ្នា ដែលធ្វើឡើងចំពោះកុមារ ១២០០០នាក់ ដែលមានអាយុ ៦ ទៅ១៨ឆ្នាំ។
អ្នកស្រីបណ្ឌិត Amika Singh មកពីសាកលវិទ្យាល័យវេជ្ជសាស្រ្ដ Vrije Universiteit ក្នុងទីក្រុងអាមស្ទើដាម នៃប្រទេសហុល្លង់ ដែលដឹកនាំការស្រាវជ្រាវនេះ បានធ្វើការប្រៀបធៀបពីសកម្មភាពផ្នែករាងកាយរបស់កុមារ ជាមួយនឹងលទ្ធផលនៃការសិក្សារបស់ពួកគេ។
ជាលទ្ធផលបានបង្ហាញថា កុមារដែលមានភាពសកម្មភាពផ្នែករាងកាយច្រើន គឺមានភាពប្រសើរនៃការរៀនសូត្រក្នុងថ្នាក់រៀនផងដែរ។
សកម្មភាពផ្នែករាងកាយរបស់កុមារ គឺភាគច្រើនគឺជាសកម្មភាពក្នុងផ្នែកកីឡានានារបស់សាលា ឬការលេងកំសាន្ដនានា។ ក្រុមអ្នកស្រាវជ្រាវបានវាស់ស្ទង់កម្រិតនៃការចូលរួមរបស់ពួកគេ ក្នុងផ្នែកកីឡា ជាមួយនឹងលទ្ធផលនៃការសិក្សាក្នុងថ្នាក់របស់ពួកគេ។
មូលហេតុដែលក្រុមអ្នកស្រាវជ្រាវលើកឡើង គឺដោយសារតែ នៅពេលដែលកុមារហាត់ប្រាណ ឬលេងកីឡា នោះកម្រិតឈាមរត់ និងអុកស៊ីសែនទៅកាន់ខួរក្បាល គឺមានការកើនឡើង ដែលធ្វើឲ្យខួរក្បាលបញ្ចេញសកម្មភាពបានរហ័ស។
មិនត្រឹមតែប៉ុណ្ណោះទេ កុមារដែលចូលរួមលេងកីឡា ក៏បានរៀនពីរបៀបគោរពវ័យផងដែរ។ ការមានទម្លាប់គោរពវិន័យក្នុងកីឡា ក៏អាចធ្វើឲ្យកុមារបន្តទម្លាប់ល្អនេះក្នុងថ្នាក់រៀននោះដែរ។ ការគោរពវិន័យនេះ ក៏ជាកត្តាដែលជួយជម្រុញកុមារឲ្យរៀនពូកែផងដែរ តាមរយៈការយកចិត្តទុកដាក់ក្នុងម៉ោងរៀន។