Things Happened: March 2012

មានកូនជួយឲ្យបុរសកាត់បន្ថយរោគបេះដូង

បុរសអត់កូន

នេះ ប្រហែលជាដំណឹងដ៏គួរឲ្យភ្ញាក់ផ្អើលសម្រាប់បិតាៗទាំងឡាយនៅ ក្នុងលោកជាមិនខាន ដោយសារតែការការសិក្សាថ្មីមួយ បានបង្ហាញថា បុរសដែលក្លាយជាឪពុកគេ គឺអាចកាត់បន្ថយជំងឺបេះដូងបានដល់ទៅជិត ២០ភាគរយ។ ការសិក្សារយៈពេល១០ឆ្នាំ ដែលចូលរួមដោយបុរស ១៣៥០០០នាក់នេះ បានរកឃើញថា បុរសណាដែលមិនមានកូន គឺនឹងប្រឈមនឹងហានីភ័យខ្ពស់ក្នុងការកើតជំងឺបេះដូង ជាងបុរសដែលមានកូន។
ក្រុមអ្នកស្រាវជ្រាវជនជាតិអាមេរិកទាំងនេះ បាននិយាយថា ការមិនមានកូន គឺអាចជាសញ្ញាព្រមានដំបូងបំផុត សម្រាប់ការកើតជំងឺបេះដូងទៅថ្ងៃអនាគតរបស់បុរស។
លោកវេជ្ជបណ្ឌិត Michael Eisenberg មកពីសាកលវិទ្យាល័យ Stanford ប្រចាំរដ្ឋកាលីហ្វ័រញ៉ា ដែលជាអ្នកដឹកនាំការស្រាវជ្រាវនេះ បានថ្លែងថា គាត់បានរកឃើញភស្ដុតាងដែលបង្ហាញថា ការមិនមានកូន អាចជះឥទ្ធិពលដែលសុខភាពរបស់បុរសទៅថ្ងៃក្រោយ។ គាត់បានបន្ដទៀតថា បុរសដែលមិនមានបុត្រ ក៏មានហានីភ័យនៃការកើតជំងឺមហារីកខ្ពស់ជាងគេផងដែរ ដែលនេះគឺជាការព្រមានដល់បុរសគ្រប់រូប ឲ្យសង្វាតក្នុងការធ្វើយ៉ាងណាឲ្យមានកូន។
នៅក្នុងការសិក្សាដែលបោះពុម្ភផ្សាយនៅក្នុងព្រឹត្តបត្រ Human Reproductioin នេះ ក្រុមអ្នកស្រាវជ្រាវបានធ្វើការសិក្សាទៅលើបុរសជាង ១៣ម៉ឺននាក់ ដែលបានចូលនិវត្តន៍ និងមានអាយុលើស ៥០ឆ្នាំ។ ក្រោយពីសិក្សារយៈពេល ១០ឆ្នាំ បុរស១០ភាគរយបានស្លាប់ ហើយ ម្នាក់ក្នុងចំណោម៥នាក់ បានស្លាប់ដោយសារជំងឺបេះដូង។
នៅពេលដែលត្រួតពិនិត្យទៅលើទិន្នន័យនៃបុរសដែលស្លាប់ដោយសារ ជំងឺបេះដូង លទ្ធផលបានបង្ហាញថា អ្នកដែលមិនមានកូន មានគ្រោះថ្នាក់ខ្ពស់ជាងអ្នកមានកូន ក្នុងការកើតជំងឺបេះដូងដល់ទៅ ១៧ភាគរយ។
ទោះបីជាយ៉ាងណាក៏ដោយ ហេតុផលដែលធ្វើឲ្យបុរសគ្មានកូន ប្រឈមនឹងជំងឺបេះដូង គឺនៅមិនទាន់ច្បាស់នៅឡើយទេ។ លោកវេជ្ជបណ្ឌិតដែលដឹកនាំការស្រាវជ្រាវនេះបានបញ្ជាក់ថា នេះប្រហែលជាមកពីកត្តាជីវសាស្រ្ដ ប៉ុន្ដែការសិក្សាផ្សេងទៀត នឹងត្រូវធ្វើឡើង ដើម្បីរកឲ្យឃើញពីមូលហេតុពិតប្រាកដ។

គេងតិចពេក មិនល្អសម្រាប់បេះដូងនោះទេ!

អ្នកលេងអ៊ីនធើណិតពេលយប់

ការ គេងតិចពេក ពោលគឺគេងតិចជាង ៦ម៉ោងក្នុងមួយយប់ ត្រូវបានគេរកឃើញថា អាចបណ្ដាលឲ្យកើតជំងឺគាំងបេះដូង និងជំងឺដាច់សរសៃឈាមក្នុងខួរក្បាល (ស្រ្ដូក)។ ការសិក្សាស្រាវជ្រាវថ្មីមួយ ដែលសិក្សាលើមនុស្សចំនួនជាង ៣០០០នាក់ ដែលមានអាយុលើស ៤៥ឆ្នាំ បានបង្ហាញថា អ្នកដែលគេងតិចជាង៦ម៉ោងក្នុងមួយយប់ គឺមានហានីភ័យនៃជំងឺគាំងបេះដូង និងជំងឺស្រ្ដូក ពីរដងលើសអ្នកដែលគេងពី៦ទៅ៨ម៉ោងក្នុងមួយយប់។
លោកវេជ្ជបណ្ឌិត Rohit R. Arora អ្នកជំនាញខាងជំងឺបេះដូងមកពីសាលាវេជ្ជសាស្រ្ដ Chicago បានថ្លែងថា រយៈពេលនៃការគេងដែលល្អ គឺពី៦ទៅ៨ម៉ោង។
គួរកត់សម្គាល់ផងដែរថា នេះមិនមែនជាការស្រាវជ្រាវលើកដំបូងនោះទេ ដែលរកឃើញពីទំនាក់ទំនងនៃការគេង ជាមួយនឹងសុខភាពបេះដូង ប៉ុន្ដែវាជាការស្រាវជ្រាវដែលធំជាងគេ។
យោងតាមលទ្ធផលនៃការស្រាវជ្រាវនេះ យើងអាចសន្និដ្ឋានបានថា មនុស្សជាច្រើនដែលនៅទីក្រុង គឺមានហានិភ័យខ្ពស់ក្នុងការកើតជំងឺបេះដូង ដោយសារតែពួកគេគេងមិនសូវបានគ្រប់គ្រាន់នោះទេ។ នៅកម្ពុជាយើងមិនទាន់មានទិន្នន័យនៃអ្នកដែលគេងតិចជាង ៦ម៉ោងនោះទេ ប៉ុន្ដែនៅអាមេរិក មនុស្សពេញវ័យដល់ទៅជិត ៣០ភាគរយ គេងតិចជាង៦ម៉ោងក្នុងមួយយប់។
យ៉ាងណាមិញ ហេតុផលដែលការគេងជះឥទ្ធិពលដល់បេះដូង គឺមិនច្បាស់នោះទេ ពោលគឺថាតើវាជះឥទ្ធិពលដោយផ្ទាល់ ឬដោយប្រយោល។ ប៉ុន្ដែបើតាមអ្នកជំនាញ បានឲ្យដឹងថា នៅពេលគេងមិនគ្រប់គ្រាន់ នោះមនុស្សអាចក្លាយជាស្រ្ដេស បញ្ចេញអ័រម៉ូនដែលជំនួយដល់បេះដូង និងបង្កើនកម្រិតឈាម។
ប្រសិនបើមានការស្រាវជ្រាវផ្សេងទៀត ទាក់ទងនឹងរឿងនេះ ខ្មែរសារិកា នឹងនាំមកជូនប្រិយមិត្តជាបន្តទៀត!

ផលលំបាកនៃការចូលគេងយប់ជ្រៅ

សុភាព ស្ត្រីដែលមានទម្លាប់ចូលគេងយប់ជ្រៅ ឬគិតចាប់តាំងពីក្រោយម៉ោង ១១ទៅ១២នោះ តើលោកអ្នកជ្រាបឬទេថា ទង្វើនេះកំពុងតែបំផ្លាញសុខភាពរាងកាយជាប្រយោល ពិសេសថង់ប្រមាត់ ព្រោះថានៅក្នុងអំឡុងពាក់កណ្តាលអាធ្រាតបែបនេះ វាជាពេលវេលាដែលថង់ប្រមាត់កំពុងបំពេញការងារដើម្បីជួយរំលាយ ជាតិខ្លាញ់ដែលយើងបានទទួលទានចូលទៅក្នុងថ្ងៃនិមួយៗនោះ។
ប្រសិនបើយើងមានទម្លាប់អត់ងងុយជាញឹកញាប់ ក្រៅពីមិនអាចរំលាយខ្លាញ់បានទៅតាមធម្មជាតិហើយនោះ លទ្ធផលចុងក្រោយ គឺរោគធាត់ដុះក្បាលពោះស្អុយនិងកើតមានឡើង។ ការអត់ងងុយវាថែមទាំងធ្វើអោយតួនាទីការងាររបស់ថង់ប្រមាត់កើត មានភាពខុសប្រក្រតីរហូតក្លាយទៅជាគ្រួសក្នុងថង់ប្រមាត់បាន ទៀតផង។ ក៏ប៉ុន្តែក៏មានវិធីអាចដោះស្រាយបានខ្លះៗដូចគ្នា សំរាប់អ្នកថែទាំថង់ប្រមាត់អោយរំលាយអាហារបានល្អជាប្រក្រតី ក្នុងពេលវេលាយប់ជ្រៅនោះ គឺការស្វែងរកទឹកខ្ញីក្តៅឧណ្ហៗមកលាយជាមួយនិងទឹកឃ្មុំបន្តិច ហើយទទួលទានក្នុងពេលយប់ជ្រៅដែលលោកអ្នកចាំបាច់ត្រូវអត់ងងុយ ពិតៗ។ ក៏ប៉ុន្តែប្រសិនបើអាចធ្វើទៅបានក៏មិនគួរចូលគេងយប់ជ្រៅពេក នោះដែរ ព្រោះអវយវៈផ្សេងៗក្នុងរាងកាយរបស់យើងមិនបានបំពេញការងារយ៉ាងមាន ប្រសិទ្ធភាពទៅតាមធម្មជាតិ ហើយយើងក៏មិនចាំបាច់ប្រឈមទៅនិងរោគកំណាចណាមួយផ្សេងទៀតផង ដែរ៕

ការងារអង្គុយនៅនឹងកន្លែងយូរ ធ្វើឲ្យអាយុខ្លី

មនុស្ស ភាគច្រើនប្រាថ្នាចង់ធ្វើការងារនៅនឹងកន្លែង និយាយឲ្យចំគឺការងារដែលអង្គុយនៅតុការិយាល័យ។ ប៉ុន្ដែការងារដែលអង្គុយនៅនឹងកន្លែងរាប់ម៉ោង ដែលអ្នកចង់បាននោះ ត្រូវបានក្រុមអ្នកជំនាញព្រមានថា វាអាចបណ្ដាលឲ្យអ្នកមិនមានអាយុវែង ពោលគឺប្រឈមនឹងការស្លាប់មុនអាយុ។
ក្រុមអ្នកស្រាវជ្រាវដែលមកពីសាលាសុខភាពសារធារណៈនៃសាកល វិទ្យាល័យស៊ីដនី ប្រទេសអូស្រ្ដាលី បានធ្វើការសិក្សាក្នុងទំហំយ៉ាងធំ ដែលចូលរួមដោយមនុស្សទាំងប្រុស ទាំងស្រីចំនួន ២៦ម៉ឺននាក់ នៅតំបន់ New South Wales។
ក្រុមអ្នកស្រាវជ្រាវទាំងនេះបានរកឃើញថា មនុស្សដែលអង្គុយជាប់នៅនឹងតុធ្វើការងារលើសពី១០ម៉ោងក្នុងមួយថ្ងៃ នឹងប្រឈមមុខនឹងការកើនឡើងហានីភ័យនៃការស្លាប់មុនអាយុដល់ទៅ ៤៨ភាគរយ បើប្រៀបធៀបជាមួយអ្នកដែលអង្គុយតិចជាង៤ម៉ោងក្នុងមួយថ្ងៃ។
បន្ថែមលើនេះទៀត ការកើនឡើងនៃហានីភ័យនៃការស្លាប់មុនអាយុនេះ គឺនៅតែខ្ពស់ បើទោះបីជាពួកគេហាត់ប្រាណជាប្រចាំយ៉ាងណាក៏ដោយ។
លោក Adrian Bauman ដែលជាអ្នកដឹកនាំការស្រាវជ្រាវនេះ បានថ្លែងបញ្ជាក់ថា មនុស្សគ្រប់រូបនឹងមានហានីភ័យនៃការស្លាប់មុនអាយុតិច ប្រសិនបើអ្នកនោះហាត់ប្រាណបានទៀតទាត់ ហើយមិនអង្គុយយូរ។ ប្រសិនបើអ្នកអង្គុយយូរជ្រុលនោះ ទោះបីហាត់ប្រាណយ៉ាងណា ក៏អ្នកនៅតែប្រឈមមុខខ្ពស់នឹងការស្លាប់លឿនដដែល។
ខណៈដែលក្រុមអ្នកស្រាវជ្រាវទាំងនេះ នៅតែមិនទាន់ច្បាស់នៅឡើយ ថាហេតុអ្វីបានគ្រាន់តែអង្គុយយូរជ្រុល បង្កឲ្យមានគ្រោះថ្នាក់ដល់អាយុជីវិត ពួកគេបានសន្មតថា ការអង្គុយយូរពេក នឹងធ្វើឲ្យបង្កើនកង្កើនជាតិស្ករនៅក្នុងខ្លួន។
លោក Bauman បានពន្យល់ថា អ្វីដែលកើតឡើងនៅពេលដែលអង្គុយ គឺអាហារដែលទើបនឹងញ៉ាំហើយ បានប្រែក្លាយទៅជាស្ករ ដែលធ្វើឲ្យកម្រិតជាតិស្ករនៅក្នុងឈាមឡើងខ្ពស់។
ទោះបីជាយ៉ាងណាក៏ដោយ ប្រសិនបើអ្នកចាំបាច់ត្រូវអង្គុយក្នុងរយៈពេលយូរ ដែលមិនអាចខានបាន អ្វីដែលអ្នកត្រូវធ្វើ គឺបង្កើនការហាត់ប្រាណឲ្យបានច្រើនជាងធម្មតា។

មនុស្សស្រីមានប្រព័ន្ធភាពស៊ាំនឹងជំងឺ ខ្លាំងជាងបុរស

ស្រ្ដី

ការ ស្រាវជ្រាវថ្មីមួយបានបង្ហាញថា ចំនួនក្រូម៉ូសូមដែលលើសនៅក្នុងខ្លួនរបស់ស្រ្ដី បានធ្វើឲ្យស្រ្ដីមានលក្ខណៈប្រសើរជាងបុរស ក្នុងការទប់ស្កាត់ប្រឆាំងនឹងជំងឺផ្សេងៗ។ ការសិក្សាដែលបានរាយការណ៍ក្នុង Daily Mail បានដឹកនាំដោយលោកវេជ្ជបណ្ឌិត Claude Libert មកពីសាកលវិទ្យាល័យ Ghent នៃប្រទេសប៊ែលហ្សិកនេះ បានរកឃើញថា ខណៈដែលស្រ្ដីមានចំនួនក្រូម៉ូសូម X បុរសមិនមាននោះទេ ហើយក្រូម៉ូសូម Y ដែលបុរសមាន ក៏តិចជាងស្រ្ដីនោះដែរ។
លោកវេជ្ជបណ្ឌិត Libert បាននិយាយថា ស្រ្ដីគឺជាភេទដែលរស់នៅបានយូរជាងបុរស (មានអាយុវែងជាងបុរស) ហើយក៏មានលទ្ធភាពខ្ពស់ ក្នុងការប្រយុទ្ធប្រឆាំងនឹងជំងឺឆ្លងផ្សេងៗខ្លាំងជាងបុរសផងដែរ។
ក្រុមអ្នកស្រាវជ្រាវទាំងនេះ បានរកឃើញថា ការដែលមនុស្សស្រីមានប្រព័ន្ធភាពស៊ាំខ្លាំងជាងមនុស្សប្រុស គឺដោយសារតែ ក្រូម៉ូសូមអិច (X) ដែលមាននៅក្នុងខ្លួនរបស់ពួកគេ។
ឆ្លើយតបទៅនឹងលទ្ធផលនៃការស្រាវជ្រាវនេះ អ្នកអ្នកស្រីវេជ្ជបណ្ឌិត Eleanor Fish មកពីសាកលវិទ្យាល័យ Toronto ដែលជាសាស្រ្ដាចារ្យផ្នែកប្រព័ន្ធភាពស៊ាំ បានសរសេរក្នុងប្លុកព្រឹត្តបត្រសុខភាព Bio-Essays ថា នេះគឺជាអត្ថប្រយោជន៍នៃការមានក្រូម៉ូសូមអិចលើសចំនួន ប្រសើរជាការមានតែ ក្រូម៉ូសូមអិចតែមួយ និងក្រូម៉ូសូមវ៉ាយ (Y) តែមួយ។
អ្នកស្រីវេជ្ជបណ្ឌិតរូបនេះ បានថ្លែងថា MicoRNAs (ក្រូម៉ូសូមអិច) គឺពិតជាសំខាន់បំផុត សម្រាប់ធ្វើឲ្យប្រូតេអ៊ីនដែលមាននៅក្នុងខ្លួនដំណើរការល្អ។ វាអាចជួយទប់ស្កាត់ជំងឺមហារីកផងដែរ និងជួយជម្រុញប្រូតេអ៊ីនដែលល្អ។
អ្វីដែលក្រុមអ្នកស្រាវជ្រាវបង្ហាញថា ស្រ្ដីមានភាពស៊ាំខ្លាំងជាងបុរស គឺត្រូវបានទទួលការគាំទ្រច្រើន ដោយសារតែសភាពជាក់ស្ដែងគឺដូច្នេះមែន ដោយសារអាយុសង្ឃឹមរស់របស់ស្រ្ដីនៅប្រទេសភាគច្រើន គឺវែងជាងបុរស។ ទោះបីជាយ៉ាងនេះក្ដី ក៏មានការជំទាស់ផងដែរ ដោយលើកឡើងថា ស្រ្ដីទន់ខ្សោយជាងបុរស ងាយរងជំងឺឆ្លងផ្សេងៗ។

ថ្នាំមហារីកសុដន់ អាចធ្វើឲ្យកើតទឹកនោមផ្អែម?

ការ សិក្សាថ្មីមួយរបស់កាណាដា បានបង្ហាញថា ស្រ្ដីវ័យចំណាស់ដែលប្រើប្រាស់នូវឱសថព្យាបាលជំងឺមហារីកសុដន់ អាចបង្កើនហានីភ័យនៃការកើតជំងឺទឹកនោមផ្អែម លើសស្រ្ដីដែលមិនប្រើឱសថដូចគ្នានេះ។
ការរកឃើញដែលបោះពុម្ភនៅក្នុងព្រឹត្តិបត្រជំងឺមហារីកនេះ មិនបានបង្ហាញថាថ្នាំ តាម៉ូស៊ីហ្វ៊ែន (tamoxifen) ដែលជាថ្នាំប្រើសម្រាប់អ្នកជំងឺមហារីកសុដន់ បានចូលរួមចំណែកបង្កើនឱកាសនៃការកើតជំងឺទឹកនោមផ្អែម ប៉ុន្ដែមិនមែនដោយផ្ទាល់នោះទេ។ ក្រុមអ្នកស្រាវជ្រាវ បាននិយាយថា ក្រៅតែពីកត្តាដែលបង្កឲ្យកើតជំងឺទឹកនោមផ្អែមដែលមានដូចជា ការធាត់ជ្រុល ឬប្រវត្តិគ្រួសារធ្លាប់កើតជំងឺនេះ ការប្រើប្រាស់ថ្នាំ តាម៉ូស៊ីហ៊្វែន ក៏ជាកត្តារួមផ្សំផងដែរ។
ការសិក្សានេះ បានធ្វើឡើងចំពោះស្រ្ដីច្រើនជាង ១៤០០០នាក់ ដែលកើតជំងឺមហារីកសុដន់ មានអាយុចាប់ពី ៦៥ឆ្នាំឡើងទៅ។ ក្នុងរយៈពេល១០ឆ្នាំនៃការស្រាវជ្រាវនេះ គេបានរកឃើញថា ស្រ្ដីចំនួន ១០ភាគរយបានកើតជំងឺទឹកនោមផ្អែម។
ក្នុងនោះដែរ ស្រ្ដីដែលកំពុងប្រើប្រាស់ថ្នាំ តាម៉ូស៊ីហ៊្វែន មានអត្រាក្នុងការកើតទឹកនោមផ្អែមខ្ពស់ជាងស្រ្ដីដែលមិនប្រើ ដល់ទៅ ២៥ភាគរយ។
ទោះបីជាយ៉ាងណាក្ដី អ្នកស្រី Lorraine L. Lipscombe មកពីសាកលវិទ្យាល័យតូរ៉ុនតូ នៃប្រទេសកាណាដា ដែលជាអ្នកដឹកនាំការស្រាវជ្រាវនេះ បាននិយាយថា ការកើនឡើងនៃកម្រិតគ្រោះថ្នាក់ គឺតូចណាស់ ដូច្នេះ ការរកឃើញនេះគួរតែមិនចាំបាច់ប្រកាសប្រាប់ស្រ្ដីដែលកំពុងប្រើ ថ្នាំនេះទេ។ ថ្នាំ តាម៉ូស៊ីហ្វ៊ែន គឺជាថ្នាំដ៏សំខាន់បំផុត ដូច្នេះ អ្នកស្រីមិនចង់ឲ្យស្រ្ដីទាំងឡាយឈប់ប្រើវានោះទេ។
អ្នកស្រីរូបនេះបានបញ្ជាក់បន្ថែមទៀតថា ការសិក្សារបស់គាត់ និងសហការីនេះ គឺជាការសិក្សាដែលបង្ហាញជាលើកដំបូងនៃការទាក់ទងគ្នារវាងថ្នាំ តាម៉ូស៊ីហ្វ៊ែន និងជំងឺទឹកនោមផ្អែម ដូច្នេះចាំបាច់ត្រូវមានការសិក្សាជាច្រើនផ្សេងទៀត ដើម្បីរកឲ្យឃើញកាន់តែច្បាស់។ ក្រៅពីនេះ ការសិក្សាផ្សេងទៀត គួរតែបញ្ចូលស្រ្ដីវ័យក្មេងដែរ ព្រោះថាការសិក្សារបស់គាត់លើកនេះ គឺធ្វើឡើងចំពោះតែស្រ្ដីវ័យចំណាស់ប៉ុណ្ណោះ ដើម្បីដឹងថាស្រ្ដីវ័យក្មេងមានកម្រិតគ្រោះថ្នាក់ដូចគ្នាដែរឬទេ ។
ប្រសិនបើថ្នាំ តាម៉ូស៊ីហ្វ៊ែន ពិតជាបង្កើនហានីភ័យនៃជំងឺទឹកនោមផ្អែមមែន នោះវានឹងធ្វើឲ្យថ្នាំនេះកាន់តែមានឈ្មោះមិនល្អបន្ថែមទៀត ព្រោះបើយោងតាមវិទ្យាស្ថានជាតិមហារីកនៃសហរដ្ឋអាមេរិក បានរកឃើញថា ថ្នាំនេះបានបង្កើនកម្រិតគ្រោះថ្នាក់នៃជំងឺដាច់សរសៃឈាមក្នុងខួរក្បាល ជំងឺឈាមកក ជំងឺមហារីកស្បូន និងជំងឺភ្នែកឡើងបាយ ។
យ៉ាងណាមិញ អត្ថប្រយោជន៍នៃថ្នាំ តាម៉ូស៊ីហ្វ៊ែនសម្រាប់ជំងឺមហារីកសុដន់ គឺវាបានលប់បាត់លើហានីភ័យទាំងនោះបាត់ទៅហើយ។

កង្វក់ខ្យល់ ធ្វើឲ្យស្រ្ដីកើតកូនមិនគ្រប់ខែ

ឡានមួយផ្សែងប៉ុណ្ណឹង ចុះទម្រាំឡានរាប់ម៉ឺនគ្រឿងទៀត?

ស្រ្ដីមាន ផ្ទៃពោះទាំងឡាយ ចូរបង្កើនការប្រុងប្រយ័ត្ន និងការពារខ្លួនឲ្យបានខ្លាំងក្លា ព្រោះការសិក្សាចុងក្រោយមួយបានរកឃើញថា កង្វក់បរិយាកាសដោយសារខ្យល់កខ្វក់ អាចធ្វើឲ្យស្រ្ដីដែលរស់នៅទីក្រុង កើនឡើងហានីភ័យនៃការកើតកូនមិនគ្រប់ខែដល់ទៅ ៣០ភាគរយ។ ការស្រាវជ្រាវដែលធ្វើឡើងចំពោះទារកដែលទើបកើតថ្មីចំនួន ១០ម៉ឺននាក់នេះ បានរកឃើញថា សារធាតុគីមីពុលក្នុងខ្យល់ ដែលបង្កឡើងដោយផ្សែងឡានម៉ូតូក្នុងតំបន់ដែលមានចរាចរច្រើន (ទីក្រុង) បានបំផ្លាញសុខភាពរបស់ទារកដែលនៅក្នុងផ្ទៃ ក៏ដូចជាម្ដាយទារកផងដែរ។
ខ្យល់ដែលកាន់តែមានជាតិពុលច្រើនបំផុតនោះ គឺខ្យល់ក្នុងខែត្រជាក់ មិនមែនខែក្ដៅនោះទេ ហើយតំបន់ដែលនៅឆ្ងាយពីឆ្នេរសមុទ្ទ គឺជាតំបន់ដែលមានជាតិពុលច្រើន។
លោកវេជ្ជបណ្ឌិត Beate Ritz មកពីសាកលវិទ្យាល័យកាលីហ្វ័រញ៉ា ប្រចាំសហរដ្ឋអាមេរិក បានថ្លែងថា កង្វក់ខ្យល់ ត្រូវបានគេរកឃើញថា មានទំនាក់ទំនងនឹងការកើតកូនមុនកាលកំណត់ និងការកើតកូនដែលមិនគ្រប់ទម្ងន់។ លទ្ធផលនៃការសិក្សានេះ បានបង្ហាញថា កង្វក់ដែលបណ្ដាលពីចរាចរតាមដងផ្លូវ គឺមានគ្រោះថ្នាក់ខ្លាំងជាងគេ ដូច្នេះត្រូវតែចេះការពារខ្លួន។
នៅក្នុងការសិក្សាដែលបានបោះពុម្ភផ្សាយក្នុងព្រឹត្តបត្រសុខ ភាព Environment Health នេះ បានធ្វើឡើងក្នុងទំហំយ៉ាងធំ ពោលគឺ ទៅលើទារកដល់ទៅ ១០ម៉ឺននាក់ នៅឡូស អ៊ែនជើលែស ចាប់ពីខែមិថុនា ឆ្នាំ២០០៤មក។
ក្រោយពីមានការសហការពីក្រុមមន្រ្ដីសុខាភិបាលក្នុងតំបន់ ក្រុមអ្នកស្រាវជ្រាវបានរកឃើញថា ការស្រូបយកខ្យល់កខ្វក់ ដែលបង្កឡើងដោយផ្សែងរថយន្ត បានបង្កើនហានីភ័យនៃការកើតកូនមុនកំណត់ ដល់ទៅ៣០ភាគរយឯណោះ។
មិនត្រឹមតែការសិក្សាដែលរកឃើញបែបនេះ អ្វីដែលយើងគ្រប់គ្នាបានដឹងនោះគឺ ខ្យល់កខ្វក់នៅមានផលអាក្រក់ជាច្រើនទៀត ដូច្នេះអ្វីដែលយើងត្រូវធ្វើគឺត្រូវចេះការពារខ្លួន។ ប្រសិនបើយើងចេញទៅក្រៅ យើងគួរពាក់ម៉ាស់ការពារ ព្រោះវាអាចជួយទប់ស្កាត់ខ្យល់កខ្វក់ទាំងនោះបានផងដែរ។

គួរបញ្ឈប់ការចាប់ដៃ ដើម្បីការពារជំងឺផ្ដាសាយ?

ការ ចាប់រលាក់ដៃគ្នារវាងក្រុមអ្នកជំនួញ អ្នកនិយោបាយ និងមនុស្សគ្រប់រូប គួរតែត្រូវបញ្ចប់ដែរឬទេ នៅពេលដែលពេលនេះក្រុមអ្នកវិទ្យាសាស្រ្ដបានបញ្ជាក់ថា មនុស្សគ្រប់រូបមិនគួរចាប់ដៃអ្នកដទៃនោះទេ ព្រោះវាជាមូលហេតុនៃការរីកសាយភាយនៃជំងឺឆ្លងផ្សេងៗ ជាពិសេសគឺជំងឺផ្ដាសាយ។
លោកវេជ្ជបណ្ឌិត Nathan Wolfe ដែលជាអ្នកជំនាញខាងមេរោគ មកពីសាកលវិទ្យាល័យ Stanford នៅកាលីហ្វ័រញ៉ា បានស្នើឲ្យយើងគ្រប់គ្នា គួរតែប្រើប្រើវិធីផ្សេង ក្រៅពីការចាប់រលាក់ដៃគ្នា ព្រោះវាមានសុវត្ថិភាពជាង ដូចជាអោនក្បាលដាក់គ្នា ដូចវប្បធម៌ជប៉ុន (ការសំពះដូចស្រុកខ្មែរយើង គឺកាន់តែល្អ)។
យោងតាមសារព័ត៌មាន Sunday Times លោកវេជ្ជបណ្ឌិត Wolfe បានថ្លែងថា ជំងឺឆ្លង ដែលមានដូចជាផ្ដាសាយជាដើមនោះ គឺងាយនឹងរីករាលដាលខ្លាំងណាស់ តាមរយៈការប៉ះពាល់ស្បែក។
អ្នកជំនាញរូបនេះ ក៏បានបញ្ជាក់នៅក្នុងសៀវភៅថ្មីរបស់គាត់ផងដែរថា យើងគួរតែធ្វើការតស៊ូមតិកុំឲ្យមានការចាប់ដៃគ្នា ដើម្បីបញ្ជាក់ពីមិត្តភាពតទៅទៀត ដោយងាកមកធ្វើការគោរពគ្នាតាមរយៈការឱនក្បាល (ឬសំពះ) វិញ ព្រោះវាអាចកាត់បន្ថយការរីករាលដាលនៃជំងឺផ្ដាសាយបាន។
លោក Ben Killingley ដែល ជាអ្នកជំនាញខាងមេរោគឆ្លងមកពីសាកលវិទ្យាល័យ Nothingham ក៏បាននិយាយមិនខុសពីលោក Wolfe ដែរ ដោយបានថ្លែងថា ដៃអាចចម្លងជំងឺផ្ដាសាយបាន ប៉ុន្ដែបើសិនជាយើងលាងដៃរបស់យើងឲ្យបានជាប្រចាំ នោះយើងមិនចាំបាច់បញ្ឈប់ការចាប់ដៃគ្នានោះទេ។
មេរោគ អាចរីករាលដាលតាមរយៈខ្យល់ នៅពេលដែលមានអ្នកកើតផ្ដាសាយណាម្នាក់ កណ្ដាស ឬក្អក ជាពិសេសស្ថិតនៅក្នុងចំណោមហ្វូងមនុស្សច្រើន។ អ្វីដែលកាន់ តែគ្រោះថ្នាក់ជាងនេះទៀតនោះ គឺការរីកសាយភាយនៅក្នុងការិយាល័យ ដែលអ្នករូមការងារនឹងគ្នា ចាប់ដៃ ពេលជួបគ្នាច្រើនដង។ ទោះ ជាយ៉ាងណាក្ដី ដូចជាពិបាកណាស់ ក្នុងការបញ្ឈប់នូវរបៀបរបបបែបអឺរ៉ុបមួយនេះ ដូច្នេះអ្វីដែលត្រូវធ្វើនោះ គឺត្រូវលាងដៃឲ្យបានញឹកញាប់។

ជក់បារី អាចបណ្ដាលឲ្យខ្វាក់បាន

អ្នកជក់បារី

ការ សិក្សាថ្មីមួយបានបង្ហាញថា ស្ទើតែ៦នាក់ ក្នុងចំណោមអ្នកជក់បារី១០នាក់ ឬស្មើនឹង ៥៧,៥ភាគរយនៃអ្នកជក់បារីទាំងអស់ នៅក្នុងប្រទេសសិង្ហបុរី គឺខ្វាក់ ដែលនិយាយឲ្យចំ គឺការជក់បារីគឺអាចបណ្ដាលឲ្យខ្វាក់បាន។ ការស្រាវជ្រាវដែលធ្វើឡើងដោយក្រុមវេជ្ជបណ្ឌិតសឹង្ហបុរី និងក្រុមអ្នកស្រាវជ្រាវបាន ធ្វើឡើងលើអ្នកជក់បារី ២០០នាក់ ចន្លោះអាយុពី ១៤ ទៅ ៨៣ឆ្នាំ។
ការខ្វាក់ភ្នែក គឺជាពិការភាពដែលមនុស្សគ្រប់រូបភ័យខ្លាចបំផុត ប៉ុន្ដែចំពោះអ្នកជក់បារី មានតែ៤នាក់ប៉ុណ្ណោះ ក្នុងចំណោម១០នាក់ ដែលបានដឹងពីហានីភ័យនេះ។
ដូចដែលធ្លាប់បានដឹងរួចមកហើយថា ការជក់បារី គឺប្រៀបដូចជាការដុតលុយ និងដុតជីវិតខ្លួនឯងចោលដូច្នេះដែរ ពោលគឺមានផលប៉ះពាល់ដល់សុខភាពច្រើនណាស់ ដូចជាមហារីកសួត គាំងបេះដូង និងជំងឺសាហាវៗជាច្រើនទៀត ប៉ុន្ដែអ្នកជក់បារីគឺនៅតែមានដដែល។
ការរកឃើញដដែលនេះ ក៏បានបង្ហាញដែរថា ការភ័យខ្លាចខ្វាក់ភ្នែក គឺជាការជម្រុញធំទីពីរសម្រាប់ឲ្យអ្នកជក់បារីទាំងឡាយសម្រេច ចិត្តឈប់ជក់បារី ខណៈដែល ជំងឺមហារីកសួត គឺជាការភ័យខ្លាចធំទីពីរ។
ច្រើនជាងពាក់កណ្ដាលនៃក្រុមអ្នកចូលរួមក្នុងការស្រាវជ្រាវនេះ ក៏បានបង្ហាញអារម្មណ៍ចង់ឈប់ជក់បារីផងដែរ ក្រោយពីឃើញនូវការព្រមានស្ដីពីគ្រោះថ្នាក់ចំពោះសុខភាព។
ក្រុមអ្នកជំនាញខាងវេជ្ជសាស្រ្ដបាននិយាយថា ការរកឃើញនាពេលនេះ ចាំបាច់ត្រូវតែធ្វើឲ្យដឹងដល់សាធារណៈជន ព្រោះមិនមានមនុស្សច្រើនទេ ដែលដឹងថា បារីអាចធ្វើឲ្យខ្វាក់បាននោះ។
ក្រៅតែពីឈប់ជក់បារី ក៏នៅមានវិធីផ្សេងទៀតដែរ ដើម្បីបង្ការការងងឹតភ្នែក ដូចជាការទទួលទាននូវអាហារដែលសម្បូរបន្លែ និងជាតិវីតាមីន នេះបើយោងតាមក្រុមអ្នកជំនាញ។

សូកូឡា កាត់បន្ថយជំងឺដាច់សរសៃឈាមក្នុងខួរក្បាល

ស្រ្ដីញ៉ាំសូកូឡា

ក្រុម អ្នកស្រាវជ្រាវមួយក្រុមនៃប្រទេសស៊ុយអែត ដែលធ្វើការសិក្សាទៅលើស្រ្ដីជនជាតិស៊ុយអែតចំនួន ៣៣០០០នាក់ បានរកឃើញថា ស្រ្ដីដែលញ៉ាំសូកូឡាច្រើន មានអត្រានៃការកើតជំងឺស្រ្ដូកតិច។ លទ្ធផលនេះ បានបន្ថែមនូវភស្ដុតាងដែលថា សូកូឡា គឺមានប្រយោជន៍ចំពោះសុខភាព ប៉ុន្ដែទោះយ៉ាងណាក្ដី អ្នកស្រី Susanna Larsson ដែលជាអ្នកដឹកនាំការស្រាវជ្រាវនេះ បាននិយាយថា ការរកឃើញនាពេលនេះ មិនទាន់អាចបញ្ជាក់បានថា សូកូឡា ពិតជាអាចកាត់បន្ថយហានីភ័យនៃជំងឺស្រ្តូកបាននៅឡើយទេ។ អ្នកស្រីបានជឿជាក់ថា សូកូឡា ពិតជាមានប្រយោជន៍ចំពោះសុខភាព ប៉ុន្ដែការញ៉ាំវាច្រើនពេក វានឹងបង្កជាបញ្ហាវិញ។
អ្នកស្រីដែលជាអ្នកជំនាញរូបនេះ បានបញ្ជាក់ទៀតថា សូកូឡា គួរតែត្រូវទទួលទានក្នុងកម្រិតសមល្មម ដោយសារតែវាមានកាឡូរីខ្ពស់ ជាតិស្កខ្ពស់ ហើយកម្រិតជាតិធាត់ក៏ខ្ពស់ដែរ។ ក្នុងនោះដែរ សូកូឡាព៌ណខ្មៅ មានជាតិកាកាវច្រើន និងមានជាតិស្កតិចជាងសូកូឡាទឹកដោះគោ ដូច្នេះការញ៉ាំសូកូឡាពណ៌ខ្មៅគឺល្អជាង។
នៅក្នុងការស្រាវជ្រាវនេះ ក្រុមអ្នកស្រី Larsson បានធ្វើការសិក្សាទៅលើស្រ្ដីដែលមានអាយុពី ៤៩ឆ្នាំ ដល់ ៨៣ឆ្នាំ ចាប់ពីឆ្នាំ១៩៩៧មក។ ជាង១០ឆ្នាំក្រោយមក មានអ្នកកើតជំងឺស្រ្ដូកចំនួន ១៥៤៩នាក់ ដែលក្នុងនោះអ្នកដែលញ៉ាំសូកូឡាច្រើន មានកម្រិតហានីភ័យទាប។
លទ្ធផលបានបង្ហាញថា ស្រ្ដីដែលញ៉ាំសូកូឡាច្រើនជាងគេ (លើស ៤៥ក្រាមក្នុងមួយសប្ដាហ៍) មានអត្រាកើតជំងឺស្រ្ដូក ២នាក់ក្នុង១០០០នាក់ ក្នុងរយៈពេលមួយឆ្នាំ ខណៈដែលស្រ្ដីដែលញ៉ាំសូកូឡាតិចជាងគេបំផុត (តិចជាង ៨,៩ក្រាមក្នុងមួយសប្ដាហ៍) មានអត្រា ៧,៨នាក់ ក្នុង១០០០នាក់ក្នុងរយៈពេលដូចគ្នា។
សូមបញ្ជាក់ផងដែរថា ជនជាតិអាមេរិកាំងជិត ៨០ម៉ឺននាក់ បានរងគ្រោះដោយសារជំងឺស្រ្ដូកជារៀងរាល់ឆ្នាំ ហើយប្រហែលមួយភាគ៦នៃពួកគេ បានស្លាប់ដោយសារជំងឺនេះ ហើយជាច្រើននាក់ទៀតបានធ្លាក់ខ្លួនពិការ។
វិធីការពារជំងឺនេះ គឺ ត្រូវធ្វើកុំឲ្យសម្ពាធឈាមឡើងខ្ពស់ បញ្ឈប់ការជក់បារី ហាត់បា្រណឲ្យបានច្រើន និងទៀងទាត់ ព្រមទាំងញ៉ាំអាហារដែលត្រឹមត្រូវ។

បុរសលេបថ្នាំវីតាមីន E

ក្រុម អ្នកស្រាវជ្រាវនៃសហរដ្ឋអាមេរិក បានព្រមានកាលពីថ្ងៃអង្គារម្សិលម៉ិញនេះថា វីតាមីន E អាចបង្កើនហានីភ័យនៃជំងឺមហារីកក្រពេញប្រូស្ដាតបាន។ រយៈពេលមួយទសវត្សនៃការសិក្សាទៅលើបុរសជាង ៣៥០០០ពាន់នាក់ ក្រុមអ្នកស្រាវជ្រាវបានរកឃើញថា ការញ៉ាំអាហារដែលមានជាតិវីតាមីន E ច្រើន ឬលេបថ្នាំដែលផ្សំដោយវីតាមីន E អាចបង្កើនគ្រោះថ្នាក់នៃការវិវឌ្ឍទៅរកជំងឺមហារីកក្រពេញប្រូស្ដាត ដ៏គ្រោះថ្នាក់របស់បុរសនេះ។
ការសិក្សានាពេលនេះ គឺធ្វើឡើងបន្ទាប់ពីមានការសិក្សាមុនមួយ បានរកឃើញថា សេលេញ៉ូម ឬវីតាមីន E ប្រហែលជាអាចកាត់បន្ថយហានីភ័យនៃការកើតជំងឺមហារីកក្រពេញប្រូស្ដាត បាន។ ការសិក្សានេះ បានរកឃើញផ្ទុយពីការសិក្សាមុននោះ ក្រោយពីបានធ្វើការសិក្សាអស់រយៈពេលជាយូរ លើបុរសជាច្រើននាក់ ដូចបានបង្ហាញខាងលើ។
យោងតាមលទ្ធផលនៃការស្រាវជ្រាវថ្មីនេះ បានបង្ហាញថា មិនមានហេតុផលណាមួយដែលបុរសត្រូវបង្កើនជាតិវីតាមីន E នោះទេ ព្រោះមិនត្រឹមតែមានប្រយោជន៍ច្រើននោះទេ ថែមទាំងបង្កគ្រោះថ្នាក់ទៀតផង។
គួរបញ្ជាក់ផងដែរថា ការសិក្សានេះបានចាប់ផ្ដើមតាំងតែពីឆ្នាំ២០០១មកម្លេះ ហើយបន្ដរហូតដល់ពេលនេះ ដោយបានបំបែកក្រុមបុរសដែលចូលរួមជាបួនក្រុមផ្សេងគ្នា។
ជាសរុប ក្រុមបុរសចំនួន ៦២០នាក់ ដែលប្រើវីតាមីន E បានកើនអត្រាកើតមហារីកក្រពេញប្រូស្ដាតចំនួន ១៧ភាគរយ ។
ក្រុមបុរសទាំងនោះ មិនមានសញ្ញានៃជំងឺនេះទេ មុនពេលចូលក្នុងការស្រាវជ្រាវនេះ ពោល គឺមានសុខភាពល្អធម្មតា ដូច្នេះគេអាចសន្និដ្ឋានបានថា វីតាមីន E ពិតជាអាចបណ្ដាលឲ្យកើតជំងឺមហារីកក្រពេញប្រូស្ដាតមែន។
យោងតាម American Cancer Society បានបង្ហាញថា ករណីថ្មីនៃជំងឺមហារីកក្រពេញប្រស្ដាត នឹងមាន ២៤០៨៩០ ក្នុងឆ្នាំ២០១១នេះ ដោយបុរស ៣៣៧២០នាក់ នឹងស្លាបប់ដោយសារជំងឺនេះនៅសហរដ្ឋអាមេរិក។ វាជាប្រភេទជំងឺមហារីករបស់បុរស ដែលកើតច្រើនលំដាប់ទីពីរបន្ទាប់ពីមហារីកស្បែក។

ធ្វើដូចម្តេចទើបគេងឆាប់លក់

ដំណេកល្អ សុខភាពល្អ

ដំណេកគឺជាតម្រូវការដ៏ចាំបាច់មួយ ហើយក៏ជាទម្លាប់មួយផងដែរសំរាប់មនុស្សសត្វគ្រប់អាត្មា។ ប៉ុន្តែមិនមែនគ្រប់គ្នាសុទ្ធតែអាចបញ្ជារាងកាយរបស់ខ្លួនអោយ គេងលង់លក់តាមចិត្តចង់បាននោះទេ យើងភាគច្រើនទទួលស្គាល់ថា យើងមានការលំបាកនឹងធ្វើអោយខ្លួនយើងគេងឆាប់លក់ ទោះបីយើងខំប្រឹងតាំងចិត្ត សម្រួលអារម្មណ៍ លែងគិតលែងខ្វល់ពីអ្វីៗទាំងអស់ក៏ដោយ ក៏នៅតែមិនអាចធ្វើអោយយើងគេងលក់ឡើយ ហើយការដែលគេងមិនលក់នេះ អាចផ្តល់ផលមិនល្អដល់សុខភាពរបស់យើង។ អត្ថបទខាងក្រោមនេះ ជួយផ្តល់យោបល់ដល់អ្នក អំពីបច្ចេកទេសក្នុងការគេងឆាប់លក់។ ក្នុងករណីអ្នកបានព្យាយាមសាកល្បងនូវបច្ចេកទេសទាំងនេះ ហើយនៅតែមានអាចគេងលក់ទៀត ហើយស្ថានភាពនេះនៅតែបន្តច្រើនថ្ងៃជាប់ៗគ្នា អ្នកគួរតែឆាប់ស្វែងរកជំនួយពីគ្រូពេទ្យជំនាញ។

ពិនិត្យមើលរបបចំណីអាហាររបស់អ្នកឡើងវិញ៖ មានអាហារមួយចំនួនដែលអាចជាជំនួយដល់ការឆាប់ងុយគេងដូចជា ពពួកអាហារដែលមានសារជាតិកាបូនអ៊ីដ្រាតេ ចេក សណ្តែកដី ទឹកដោះគោ និង នំប៉័ងជាដើម។ អាហារទាំងនេះក៏មានផ្ទុកសារជាតិ ទ្រីតូផាន ដែលជាអ្នកបង្កើតជាតិមេឡាតូនីន ដែលជួយអោយយើងងុយគេង។ គួរជៀសវាងអាហារទាំងឡាយណា ដែលមានជាតិប្រូតេអុីនខ្ពស់ មានជាតិហិរ កាហ្វេ តែមុនពេលគេង និងជៀសវាងបរិភោគច្រើនជ្រុលមុនពេលគេង។ កុំចូលគេងទាំងឃ្លាន មិនទាន់បានញ៉ាំអ្វីចូលពោះ ពីព្រោះពេលយើងឃ្លានពិបាកនឹងគេងលក់ណាស់។

ជៀសវាងការហាត់ប្រាណក្នុងរយះពេលបីម៉ោងមុនចូលគេង៖ បើអាចទៅរួចអ្នកគួរហាត់ប្រាណនៅពេលព្រឹកព្រលឹម ព្រោះវាជួយអោយអ្នកមានអារម្មណ៍ស្រស់ស្រាយបានពេញមួយថ្ងៃ។ ការហាត់ប្រាណកៀកនឹងម៉ោងចូលគេង អាចធ្វើអោយយើងលែងងងុយគេង។

ជៀសវាងការគេងថ្ងៃច្រើនពេក៖ គួរគេងថ្ងៃយ៉ាងយូរបំផុត ១៥ នាទី។ គេងថ្ងៃយូរពេកអាចធ្វើអោយអ្នកពិបាកគេងលក់នៅពេលយប់។

កាត់បន្ថយស្ត្រេស ការបារម្ភ ភ័យ្រពួយ គិតច្រើន៖ បើអ្នកមានអាការៈទាំងនេះ គួតែជួបគ្រូពេទ្យផ្នែកចិត្តវិទ្យា ឬហាត់ប្រាណបែបយ៉ូហ្កាដើម្បីកាត់បន្ថយស្ត្រេស។

ងូតទឹកក្តៅមុនចូលគេង៖ វិធីនេះក៏អាចជួយបានដែរ វាធ្វើអោយមានអារម្មណ៍ធូរស្បើយ។

បង្កើតអោយមានទម្លាប់ធ្វើអ្វីមួយមុនចូលគេង៖ សាកល្បងទម្លាប់ធ្វើអ្វីមួយដដែល ជាប្រចាំមុនចូលគេងដូចជា អានសៀវភៅ ងូតទឹក សរសេរកំណត់ហេតុជាដើម។

ចូលគេង និងភ្ញាក់ពីគេងអោយទៀងម៉ោង៖ ធ្វើរបៀបនេះជាប្រចាំ យូរទៅនឹងក្លាយជាទម្លាប់ ចង់មិនចង់ដល់ពេលអ្នកត្រូវគេង អ្នកប្រាកដជាមានអារម្មណ៍ថាងុយគេង។

ជ្រើសរើសសំលៀកពាក់ណាដែលស្រួលស្លៀកពាក់៖ គួរស្លៀកពាក់សំលៀកបំពាក់ណាដែលមានលក្ខណៈរលុង ទន់ មិនស្កៀប មិនទើសទែង និងដែលធ្វើអោយអ្នកមានអារម្មណ៍កក់ក្តៅ។

អាកាសធាតុសមល្មម៖ បើបន្ទប់អ្នកមានម៉ាស៊ីនត្រជាក់ គួរកំរិតសីតុណ្ហភាពអោយសមល្មមដែលអ្នកពេញចិត្ត មិនគួរដាក់អោយរងាត្រជាក់ពេកទេ។ ជាទូទៅសីតុណ្ហភាពសមស្របក្នុងការគេងគឺ ២៦អង្សា។ ចំពោះអ្នកដែលគ្មានម៉ាស៊ីនត្រជាក់ ក៏គួរតែមានកង្ហារ (កង្ហារអគ្គីសនីក៏បាន កង្ហារធម្មជាតិក៏បាន)។

ពន្លឺសមល្មម៖ បើអាចបិទអោយល្ងិតបានរឹតតែល្អ តែមានមនុស្សមួយចំនួនចូលចិត្តមានភ្លើងព្រឹមៗទើបគេងលក់ ។

សុភមង្គល មិនប្រកាន់អាយុនោះទេ!

គ្រួសារដែលមានសុភមង្គល

ភាគ ច្រើននៃមនុស្សយើង តែងតែគិតថា យុវវ័យគឺជាវ័យដែលមានសុភមង្គលជាងគេ ពោលគឺជាពេលដែលសប្បាយរីករាយជាងគេក្នុងជីវិត ប៉ុន្ដែធាតុពិតគឺមិនមែននោះទេ។ សុភមង្គល គឺមិនប្រកាន់អាយុនោះទេ ដែលនេះមានន័យថា មិនថាចាស់ ឬក្មេង នោះទេ សុទ្ធតែអាចធ្វើឲ្យជីវិតសប្បាយបានដូចគ្នា។ ព្រះពុទ្ធជាម្ចាស់នៃយើង បានមានពុទ្ធដិការថា យើងគឺជាផលនៃអ្វីដែលយើងបានគិត តាមន័យនេះ សុភមង្គលមិនដែលទៅណាឆ្ងាយពីយើងនោះទេ ឲ្យតែយើងគិតថាយើងមានសុភមង្គល។ ពេលដែលអ្នកគិតបែបនេះហើយ នោះអ្នកប្រាកដជាប្រឹងប្រែងធ្វើយ៉ាងណាឲ្យសុភមង្គលនោះកើតមាន ចំពោះអ្នកមែន។
ខាងក្រោមនេះ គឺជាវិធីខ្លះដែលធ្វើឲ្យយើងនៅតែសប្បាយ និងមានសុភមង្គល បើទោះបីជាយើងចាស់ទៅៗក៏ដោយ៖
១- មានការគិតប្រកបដោយវិជ្ជមាន
មនុស្សដែលគិតក្នុងផ្លូវវិជ្ជមាន គឺតែងតែទទួលបាននូវជីវិតដ៏សប្បាយរីករាយ និងងាយស្រួល។ សូមមានសុទ្ទិដ្ឋិនិយមក្នុងខ្លួន ហើយលប់បំបាត់នូវគំនិតអវិជ្ជមានទាំងឡាយ ដែលធ្វើឲ្យអនាគតអ្នកមិនប្រសើរ។
២- លុបបំបាត់អារម្មណ៍ស្រ្ដេស
ដូចដែលដឹងហើយថា ជីវិតនៅក្នុងសម័យនេះ គឺស្រ្ដេសណាស់ ប៉ុន្ដែអ្នកត្រូវរិះរកវិធីដើម្បីកាត់បន្ថយ (ឬលុបបំបាត់) ឱកាសនៃការធ្លាក់ចូលទៅក្នុងអន្លង់ដ៏ងងឹតនៃភាពស្រ្ដេសនេះឲ្យ បាន។
៣- រាក់ទាក់
ការដាក់ខ្លួន និងរួសរាយរាក់ទាក់ គឺជាវិធីមួយដ៏ល្អបំផុតសម្រាប់អ្នក។ អ្នកអាចបង្កើតមិត្តភក្ដិបានយ៉ាងងាយ ប្រសិនបើយើងធ្វើបែបនេះបាន ហើយទំនាក់ទំនងយើងជាមួយនឹងមិត្តភក្ដិ គឺចេញពីបេះដូងដ៏បរិសុទ្ធ និងជារៀងដរាប។ សុជីវធម៌របស់អ្នក គឺនឹងជួយជម្រុញឲ្យអ្នកដទៃចូលចិត្តអ្នក និងចង់និយាយជាមួយអ្នក។
៤- កុំបន្តទម្លាប់មិនល្អ
ការផឹកគ្រឿងស្រវឹងជាប្រចាំ ការជក់បារី ការញ៉ាំអាហារមិនត្រឹមត្រូវ ឬញ៉ាំតាមតែចិត្តចង់ គឺមិនល្អចំពោះសុខភាពរបស់យើងនោះទេ។ ចូរជៀសវាងធ្វើអំពើណាដែលសង្គមស្អប់ខ្ពើម និងមិនទទួលស្គាល់។
៥- សុខភាពជាចម្បង
សុខភាពរបស់យើងម្នាក់ៗគឺសំខាន់ខ្លាំងណាស់ បានន័យថាវាជាចំណុចអទិភាពបំផុត។ សុខភាព និងសុភមង្គល គឺដើរទន្ទឹមគ្នា មិនអាចអត់មួយណាបានទេ បើសុខភាពមិនល្អហយ សុភមង្គលក៏មិននៅជាមួយនឹងយើងដែរ។ ការថែរក្សាសុខភាព មានដូចជាហាត់ប្រាណឲ្យបានទៀងទាត់ ញ៉ាំអាហារដែលមានជីវជាតិ ដែលសម្បូរទៅដោយបន្លែបៃតង និងកុំភ្លេចផ្លែឈើ។
៦- ផ្ដល់ពេលវេលាសម្រាប់ខ្លួនអ្នក
ទោះបីរវល់យ៉ាងណាក៏ដោយ មិនគួរណាភ្លេចផ្ដល់ពេលវេលាឲ្យខ្លួនឯងនោះដែរ។ ចូរធ្វើការវិភាគលើខ្លួនឯង និងរកឲ្យឃើញនូវអ្វីដែលត្រូវកែលម្អបន្ថែម។ ត្រូវចងចាំថា អ្នកគឺជាចៅក្រមសម្រាប់ខ្លួនអ្នកដ៏ល្អបំផុត។
៧- តាំងសមាធ
មនុស្សភាគច្រើនប្រហែលមិនធ្លាប់បានតាំងសមាធិ ធ្វើឲ្យចិត្តស្ងប់នោះទេ បើទោះបិជាវាមានប្រយោជន៍យ៉ាងណាក៏ដោយ។ ការតាំងសមាធិ អាចឲ្យអ្នកលុបបំបាត់អារម្មណ៍ស្រ្ដេសបានយ៉ាងប្រសើរ។
ជាចុងក្រោយ សូមបញ្ជាក់ថា សុភមង្គលគឺយើងជាអ្នកបង្កើត គ្មានអ្នកណាម្នាក់អាចផ្ដល់សុភមង្គលឲ្យយើងបាននោះទេ។ ចូរប្រយុទ្ធប្រឆាំង នឹងអារម្មណ៍ព្រួយភ័យ ហើយងាកមកសប្បាយនៅក្នុងជីវិតរបស់យើងវិញ។

ក្មេងស្រីធាត់ គ្រោះថ្នាក់ជាងក្មេងប្រុសធាត់

ក្មេងជំទង់ធាត់ៗ

ការ ធាត់លើសទម្ងន់ គឺមិនល្អចំពោះសុខភាពនោះទេ ប៉ុន្ដែតើចំណុចអវិជ្ជមានចំពោះសុខភាពនេះ គឺស្មើគ្នាឬទេ រវាងមនុស្សប្រុស និងស្រី? ចម្លើយគឺខុស បើយោងតាមការស្រាវជ្រាវរបស់អាមេរិក ដែលបានបង្ហាញថា ការធាត់បង្កឲ្យប្រឈមមុខនឹងជំងឺលើសឈាមចំពោះក្មេងជំទង់ស្រី ជាងក្មេងជំទង់ជាប្រុស។

ដូចដែលធ្លាប់បានដឹងមកហើយថា ជំងឺសម្ពាធឈាមឡើងខ្ពស់ ឬហៅឲ្យខ្លីថា លើសឈាម គឺជាកត្ដាហានីភ័យចម្បងបំផុតដែលបណ្ដាលឲ្យកើតជំងឺបេះដូង និងជំងឺដាច់សរសៃឈាមក្នុងខួរក្បាល (ស្រ្ដូក) នៅពេលឈានដល់វ័យចំណាស់។

ការសិក្សាទៅលើក្មេងជំទង់ ១៧០០នាក់ បានរកឃើញថា ក្មេងស្រីមានហានីភ័យលើសក្មេងប្រុសដល់ទៅបីដងឯណោះ ក្នុងការប្រឈមមុខនឹងការកើតជំងឺលើសឈាម។

ស្រ្ដីអ្នកនាំពាក្យរបស់មូលនិធិបេះដូងរបស់ អង់គ្លេសបាននិយាយដែរថា មួយភាគបីនៃក្មេងជំទង់នៅអង់គ្លេស គឺធាត់ជ្រុល ឬលើសទម្ងន់។

អ្នកដែលចូលរួមក្នុងការសិក្សានេះ គឺជាក្មេងជំទង់ធាត់ៗ ដែលមានអាយុចន្លោះពី ១៣ ទៅ១៧ឆ្នាំ។ ក្រោយពីបានធ្វើការវាស់ស្ទង់ពីកម្រិតឈាម ក៏ដូចជាវិភាគរួចមក ក្រុមអ្នកស្រាវជ្រាវដែលមកពីសាកលវិទ្យាល័យកាលីហ្វ័រញ៉ានេះ បានរកឃើញថា ក្មេងប្រុសដែលធាត់ គឺមានអត្រាវិវឌ្ឍទៅរកជំងឺលើសឈាម ៣,៥ដង លើសក្មេងប្រុសដែលមិនធាត់។

ប៉ុន្ដែទន្ទឹមនឹងនេះដែរ អ្វីដែលធ្វើឲ្យគេចាប់អារម្មណ៍ គឺលទ្ធផលបានបង្ហាញទៀតថា ក្មេងស្រីដែលធាត់មានអត្រាប្រឈមមុខនឹងជំងឺលើសឈាមដល់ទៅ ៩ដង លើសក្មេងស្រីដែលមានទម្ងន់ធម្មតា។

លោកវេជ្ជបណ្ឌិត Rudy Ortiz ដែលដឹកនាំការស្រាវជ្រាវនេះបានថ្លែងថា ជាសរុបរួមគឺគឺទាំងក្មេងប្រុស និងក្មេងស្រីដែលធាត់លើសទម្ងន់ គឺសុទ្ធតែប្រឈមមុខនឹងការលើសឈាម ដែលនឹងនាំទៅរកជំងឺបេះដូងទៅថ្ងៃអនាគត ប៉ុន្ដែក្មេងស្រីហាក់ដូចជាប្រឈមមុខខ្លាំងជាង។

លោកវេជ្ជបណ្ឌិតរូបនេះ បានបញ្ជាក់ដែរថា ការខុសគ្នារវាងក្មេងប្រុស និងក្មេងស្រី គឺអាចមកពីកម្រិតនៃការហាត់ប្រាណខុសគ្នា។ ជាទូទៅក្មេងស្រីបានបញ្ចេញនូវសកម្មភាពផ្នែករាងកាយតិចជាង ក្មេងប្រុសពី ៥០ទៅ៦០ភាគរយ បើយោងតាមការស្ទង់មតិកន្លងមករបស់ក្រុមអ្នកជំនាញ។

អាហារ៥ប្រភេទ ជួយការពារជំងឺមហារីក!

អាហារដែលជួយការពារមហារីក

អាហារ ប្រចាំថ្ងៃរបស់យើង គឺពិតជាសំខាន់ខ្លាំងណាស់ ហើយការធ្វើមុខម្ហូបដែលឆ្ងាញ់ពិសារ និងល្អចំពោះសុខភាពពេលខ្លះក៏មិនស្រួលប៉ុន្មានដែរ។ ទោះបីជាយ៉ាងណាក្ដី អ្នកត្រូវចងចាំថា ការញ៉ាំអាហារដែលល្អចំពោះសុខភាព គឺមិនត្រឹមតែជួយឲ្យរាងកាយរបស់អ្នកមាំមួនប៉ុណ្ណោះទេ ប៉ុន្ដែថែមទាំងអាចជួយការពារអ្នកពី ជំងឺផ្សេងៗផងដែរ។ ថ្ងៃនេះដែរ ខ្មែរសារិកា សូមនាំមកជួនលោកអ្នកនូវអាហារប្រាំប្រភេទ ដែលអាចជួយអ្នកគេចផុតពីជំងឺមហារីកបានមួយចំនួន។ អាហារទាំង៥ខាងក្រោមនេះ មានជាប្រភេទបន្លែ ផ្លែឈើ និងគ្រឿងទេសសម្រាប់ធ្វើម្ហូបផ្សេងៗផងដែរ។
សូមមើលលម្អិតដូចខាងក្រោមនេះ៖

១- សណ្ដែក

សណ្ដែក គឺជាប្រភេទអាហារដែលមិនបាច់ចំណាយច្រើនក្នុងការរកទិញ ប៉ុន្ដែអត្ថប្រយោជន៍របស់វាពិតជាច្រើន។ សណ្ដែកមានផ្សំទៅដោយ ប្រូតេអ៊ីន វីតាមីន និងសារធាតុប្រឆាំងអុកស៊ីតកម្ម។
សណ្ដែកមានច្រើនប្រភេទ ប៉ុន្ដែវាសុទ្ធសឹងតែមានប្រយោជន៍ទាំងអស់ ដែលពួកវាអាចជួយគ្រប់គ្រងទម្ងន់របស់អ្នក និងអាចជួយកាត់បន្ថយហានីភ័យនៃជំងឺបេះដូង និងជំងឺមហារីកច្រើនប្រភេទផងដែរ។
២- ផ្លែប៊ើរី

ផ្លែប៊ើរី មិនមែនជាប្រភេទផ្លែឈើដែលដុះនៅស្រុកខ្មែរនោះទេ ប៉ុន្ដែយើងអាចរកទិញវាបាននៅតាមផ្សារនានា។ វាមានច្រើនប្រភេទណាស់ ដូចជា ស្រ្ដរប៊ើរី, ប៊្លូប៊ើរី, រ៉ាសប៊ើរី, គ្រែនប៊ើរី, ឬក៏ប៊្លែកប៊ើរីជាដើម។ ប៊ើរី មានសារធាតុហ្វៃប៊ើ និងសារធាតុប្រឆាំងអុកស៊ីតកម្ម ដែលអាចជួយពន្យាភាពចាស់ជាវ័យផងដែរ។
ប៊ើរី គឺជាជម្រើសដ៏ល្អបំផុតសម្រាប់ការពារការបាត់បង់ការចងចាំ និងជាពិសេសគឺកាត់បន្ថយហានីភ័យនៃជំងឺមហារីក។
៣- បន្លែប្រភេទស្ពៃ
ស្ពៃប្រូកូលី

ការជ្រើសរើសនូវបន្លែប្រភេទស្ពៃ ដែលមានដូចជា ប្រូកូលី ស្ពៃក្ដោប ខាត់ណា និងស្ពៃជាច្រើនប្រភេទទៀត គឺពិតជាល្អ ដោយសារតែវាមានផ្ទុកទៅដោយសារធាតុ ហ្វៃប៊ើ ដែលជាភ្នាក់ងារកាត់បន្ថយគ្រោះថ្នាក់នៃជំងឺមហារីកបានមួយចំនួន ក៏ដូចជាជួយថែរក្សាទម្ងន់មិនឲ្យឡើងជ្រុល។ អ្វីដែលគួរបញ្ជាក់ផងដែរនោះ គឺប្រូកូលី (ក្នុងរូប) គឺត្រូវបានគេចាត់ទុកថាជាស្ដេចនៃបន្លែ ដោយសារតែវាមានអត្ថប្រយោជន៍ចំពោះសុខភាពច្រើន ជាពិសេសគឺមានជាតិកាល់ស្យូមច្រើន ពោលគឺស្មើនឹងទឹកដោះគោមួយកែវ មានវីតាមីន C ច្រើនជាងផ្លែក្រូច និងការពារខួរក្បាល។
៤- ខ្ទឹមស
ខ្ទឹមស

ខ្ទឹមស មានអត្ថប្រយោជន៍សុខភាពជាច្រើន ដោយសារវាមានសារធាតុប្រឆាំងអុកស៊ីតកម្ម ដូចជាជួយពង្រឹងប្រព័ន្ធភាពស៊ាំ ជួយកាត់បន្ថយសម្ពាធឈាមឡើងខ្ពស់ និងអ្វីដែលចង់បញ្ជាក់នៅទីនេះ គឺវាអាចជួយកាត់បន្ថយហានីភ័យនៃជំងឺមហារីកបានជាច្រើនប្រភេទផង ដែរ។
៥- ខ្ញី

ខ្ញី គឺជាមើមរុក្ខជាតិដែលគេប្រើសម្រាប់ជាឱសថរាប់សតវត្សមកហើយ។ វាអាចជួយការពារប្រឆាំងនឹងមហារីក និងជួយពង្រឹងប្រព័ន្ធភាពស៊ាំប្រឆាំងនឹងជំងឺ ។

ស្រ្ដីដែលស្រ្ដេសន៍ ច្រើនកើតបានកូនស្រី

ស្រ្ដីដែលស្រ្ដេសន៍

ការ សិក្សាថ្មីមួយបានបង្ហាញថា ស្រ្ដីទាំងឡាយណាដែលមានអារម្មណ៍ស្រ្ដេសន៍កំឡុងពេលចង់បានកូន គឺអាចនឹងកើតបានកូនស្រី។ ការសិក្សានេះបានរកឃើញថា ស្រ្ដីដែលស្ថិតនៅក្នុងសម្ពាធនៅកន្លែងការងារ នៅផ្ទះ ឬមានបញ្ហាស្នេហានៅរយៈពេលប៉ុន្មានសប្ដាហ៍មុនពេលមានផ្ទៃពោះ គឺមានអត្រាខ្ពស់ក្នុងការផ្ដល់កំណើតឲ្យកូនស្រី ជាជាងកូនប្រុស។ ការរកឃើញនេះ គឺដោយក្រុមអ្នកស្រាវជ្រាវរបស់សាកលវិទ្យាល័យ Oxford ចក្រភពអង់គ្លេស និងក្រុមអ្នកស្រាវជ្រាវអាមេរិក។ ក្រុមអ្នកស្រាវជ្រាវទាំងនេះ ក៏បានបញ្ជាក់ដែរថា បញ្ហាធ្លាក់ចុះនៃសេដ្ឋកិច្ចក៏អាចបណ្ដាលឲ្យស្រ្ដីភាគរយមានកូន ស្រីខ្ពស់ជាងកូនប្រុសផងដែរ។
បន្ថែមលើនេះទៀត ក្រោយពេលតែប៉ុន្មានខែប៉ុណ្ណោះបន្ទាប់ពីការវាយប្រហារ ១១កញ្ញា នៅអាមេរិក គេសង្កេតឃើញថាចំនួនកូនប្រុសដែលទើបនឹងកើតនៅទីក្រុងញូវយ៉កមានការ ធ្លាក់ចុះយ៉ាងខ្លាំង ខណៈដែលបញ្ហាសេដ្ឋកិច្ចដាំក្បាលចុះនៅក្រោយពេលដែលជញ្ជាំងប៊ែឡាំងដួល រលំនៅឆ្នាំ១៩៩១ ក៏គេឃើញមានចំនួនកូនប្រុសថយចុះយ៉ាងគំហុគផងដែរ។
ប៉ុន្ដែការសិក្សាចុងក្រោយបំផុតនេះ គឺជាការសិក្សាជាលើកដំបូងដែលរកឃើញការពិត ថាស្រ្ដេសន៍របស់ស្រ្ដី នៅក្នុងជីវិតប្រចាំថ្ងៃ គឺជាការធ្វើឲ្យស្រ្ដីទាំងនោះប្រឈមមុខនឹងការបានកូនស្រី។ ការសិក្សានេះបានធ្វើឡើងចំពោះស្រ្ដីចំនួន ៣៣៨នាក់ នៅអង់គ្លេស។
ជាលទ្ធផលបានបង្ហាញថា ស្រ្ដីដែលមានកម្រិតស្រេ្ដសន៍ខ្លាំង គឺមានអត្រាដល់ទៅ ៧៥ភាគរយក្នុងការកើតបានកូនស្រី បើប្រៀបធៀបជាមួយស្រ្ដីដែលមិនសូវមានអារម្មណ៍ស្រ្ដេសន៍។ អារម្មណ៍ស្រ្ដេសន៍របស់ស្រ្ដីទាំងនោះ គឺភាគច្រើនបណ្ដាលមកពីកន្លែងការងារ និងបញ្ហាគ្រួសារ។

ទីបំផុតវ៉ាក់សាំងគ្រុនចាញ់ដំបូងបំផុត បង្កើតបានហើយ!

លោក Joe Cohen (រូបភាព Reuters)

ទីបំផុតលោក Joe Cohen ដែល ជាអ្នកវិទ្យាសាស្រ្ដ ដែលបានចំណាយពេល ២៤ឆ្នាំ ក្នុងការព្យាយាមបង្កើតនូវវ៉ាក់សាំងគ្រុនចាញ់ជាលើកដំបូងលើលោកបាន សម្រេចតាមការព្យាយាមរបស់លោកហើយនៅថ្ងៃ ១៨ តុលា ២០១១ ម្សិលម៉ិញនេះ។ លោក Cohen បានប្រាប់រ៉យទ័រថា គាត់បានឆ្លងកាត់ឧបសគ្គច្រើនណាស់ក្នុងរយៈពេលជាច្រើនឆ្នាំដែល គាត់តែងតែគិតថា តើគាត់អាចធ្វើវាបានដែរឬទេ? តើគាត់គួរតែបន្តវាទៀតឬទេ? គឺវាពិតជាតឹងតែងខ្លាំងណាស់សម្រាប់គាត់។ នៅទីផុតការគិតរបស់គាត់ដែលថាអាចនោះ គឺពិតជាអាច ដោយសារតែវ៉ាក់សាំង RTS,S របស់គាត់ ត្រូវបានគេដាក់បង្ហាញនៅក្នុងសន្និសិទអន្តរជាតិស្ដីពីជំងឺ គ្រុនចាញ់។
គាត់បានបញ្ជាក់ពីអារម្មណ៍រំភើបស្ទើតែហោះផុតពីដីរបស់គាត់ ដោយសារតែគាត់អាចសម្រេចវាបាន។ សុបិនរបស់ក្រុមអ្នកវិទ្យាសាស្រ្ដគឺចង់ឃើញស្នាដៃខ្លួនឯងចេញជា ផ្លែផ្កា ដែលអាចជួយជីវិតមនុស្សបានរាប់លាននាក់នៅទូទាំងពិភពលោក។ គាត់បាននិយាយថា គាត់ពិតជាសំណាងខ្លាំងណាស់។
ដំណាក់កាលចុងក្រោយនៃការធ្វើការសាកល្បងនៃវ៉ាក់សាំង RTS,S ឬ អាចហៅបានថា វ៉ាក់សាំង Mosquirix ត្រូវបានគេប្រើប្រាស់សម្រាប់កុមារអាហ្វ្រិកដែលប្រឈមនឹងជំងឺគ្រុន ចាញ់ខ្ពស់។ ពេលនេះវាបានក្លាយជាវ៉ាក់សាំងគ្រុនចាញ់ដែលជោគជ័យដំបូងបំផុតនៅលើ លោក ក្នុងការការពារប្រឆាំងនឹងជំងឺដ៏សាហាវនេះ។
ដូចដែលលោកអ្នកបានដឹងរួចមកហើយថា គ្រុនចាញ់គឺជាជំងឺដែលបង្កឡើងដោយប៉ារ៉ាស៊ីតម្យ៉ាងដែលនៅក្នុងទឹក មាត់របស់មូសដែកគោល។ ជំងឺនេះបានសម្លាប់មនុស្សអស់ប្រមាណ ៧៨ម៉ឺននាក់ក្នុងមួយឆ្នាំ ដែលភាគច្រើនគឺជាទារក ឬកុមារក្មេងៗនៅទិ្វបអាហ្រ្វិក។

កុមារអាហ្វ្រិកជាអ្នកប្រឈមនឹងជំងឺគ្រុនចាញ់ខ្ពស់បំផុត

វីធីធ្វើអោយក្បាលពោះរាបស្មើល្អ

សុភាព នារីភាគច្រើនមានក្បាលពោះគឺបណ្តាលមកពីការទទួលទានមិនបាន ត្រឹមត្រូវតាមក្បួនខ្នាត រឺក៏មានទំលាប់ប្រចាំថ្ងៃមិនសូវល្អ។ ថ្ងៃនេះខ្មែរសារិកាសូមណែនាំវិធី ជួយអោយសុភាពនារីមានក្បាលពោះរាបស្មើល្អ។ សូមអនុវត្តន៍ដូចខាងក្រោម៖

-ផឹកទឹកអោយបានច្រើន៖ ព្រោះទឹកវាអាចជួយរំលាយសូដ្យូមចំណែក ណាដែលលើសបាន ហើយទឹកក៏អាចជួយកាត់បន្ថយអាការៈហើមពោះ ឆ្អល់ពោះ បានទៀតផង។
-បរិភោគអាហារអោយយឺតៗ ៖ ត្រូវទំពារអោយម៉ដ្ឋដើម្បីអោយបាក់តេរីក្នុងក្រពះមានពេលរំលា យកាន់តែច្រើនឡើង ដើម្បីកុំអោយកើតជាតិឧស្ម័នក្នុងក្រពះអាហារ។
-ទុកកែវអំបិលអោយឆ្ងាយ៖ ឬបរិភោគអំបិលអោយតិចបំផុត អាចប្តូរជាគ្រឿងទេសជំនួសវិញក៏បាន។
-បន្ថែមជាតិសរសៃទៅអោយរាងកាយ៖ ត្រូវបរិភោគផ្លែឈើអោយបានច្រើន ព្រោះវាអាចជួយកាត់បន្ថយអាការៈហើមពោះ ឆ្អល់ពោះបាន។
-រក្សាសុខភាពពោះវៀន៖ គួរទទួលទានទឹកដោះគោជូរអោយបានជាប្រចាំ ដើម្បីកំចាត់បាក់តេរីដែលមិនមានប្រយោជន៍អោយចេញពីរាងកាយ ព្រោះបាក់តេរីទាំងអស់នេះជាមូលហេតុនាំអោយហើមពោះ។
-ម៉ាស្សាខ្លួនដោយប្រេងក្រអូបឆួល៖ ការម៉ាស្សាប្រេងនេះ វាអាចជួយកាត់បន្ថយអាការៈហើមពោះ តឹងពោះបានយ៉ាងប្រសើរ។ ប្រេងដែលណែនាំនេះគឺ ប្រេងបេស៊ីល ប្រេងបឺខាម៉ត់ ឬប្រេងខាម៉ូម៉ាយរ៍ ដោយត្រូវរឹតម៉ាស្សាទៅតាមទិសនៃទ្រនិចនាឡិកា។

ទូរសព្ទដៃមិនចម្លងជំងឺមហារីកខួរក្បាលនោះទេ

ការសិក្សាថ្មីមួយបានបញ្ជាក់ថាជំងឺមហារីកខួរក្បាល មិនមានទំនាក់ទំនងជាមួយនឹងការប្រើប្រាស់ទូរសព្ទដៃទ្បើយ។

ការសិក្សាស្រាវជ្រាវចុងក្រោយនេះដែលបានដឹកនាំដោយ វិទ្យាស្ថាន Institute of Cancer Epidemiology ក្នុងប្រទេស Denmark បានសិក្សាទៅលើមនុស្សប្រមាណ ៣៥០ ០០០នាក់ ដោយពួកគេទាំងអស់គ្នាបានប្រើប្រាស់ទូរសព្ទ ក្នុងរយៈពេលប្រហែលជា ១៨ឆ្នាំ។
អ្នកស្រាវជ្រាវបានរកឃើញថា អ្នកប្រើប្រាស់ទូរសព្ទមិនមានគ្រោះថ្នាក់ធ្ងន់ជាងអ្នកដែលមិនប្រើ ទូរសព្ទនោះទេ ហើយការរកឃើញនេះបានបោះពុម្ពផ្សាយនៅក្នុងវែបសាយ British Medical Journal។

ក្នុងចំណោមមនុស្ស ៣៥០ ០០០នាក់ដែលប្រើទូរសព្ទក្នុងរយៈពេលដ៏យូរ គេបានពិនិត្យទៅឃើញថា មិនមានការរីករាលដាលនៃ ជំងឺមហារីកខួរក្បាលនោះទេ ហើយបើប្រៀបធៀបជាមួយនឹងអ្នកមិនប្រើទូរសព្ទវិញគឺកំរឹតនៃជំងឺ មហារីកខួរក្បាលមិនខុសគ្នាប៉ុន្មានទេ។

ត្រង់នេះគេចង់បញ្ជាក់ថា បើមានមនុស្សពីនាក់ ហើយគាត់ទាំងពីរនាក់នោះកើតជំងឺមហារីកខួរក្បាលដូចគ្នា ហើយមួយប្រើទូរសព្ទ មួយទៀតមិនបានប្រើទូរសព្ទទេ ជាលិទ្ធផលដែលទទួលបាន គេរកឃើញថាជំងឺមហារីកនៃអ្នកទាំងពីរនោះ មិនមានការរីកលូតលាស់ខុសគ្នានោះទេ។

ទោះជាមានការរកឃើញបែបនេះក៏ដោយ ក៏អង្គការសុខភាពពិភពលោក WHO នៅតែចាត់ទុកថាការប្រើប្រាស់ទូរសព្ទដៃដូចការផឹកកាហ្វេដែរ។ ហើយគេក៏បានអប់រំក្មេងដែលមានអាយុក្រោម១៦ឆ្នាំ កុំឲ្យនិយាយទូរសព្ទយូរពេក ហើយនិយាយនៅពេលដែលមានរឿងដែលចាំបាច់និយាយតែប៉ុណ្ណោះ ព្រោះថាអាចប៉ះពាល់ដល់សុខភាពក្មេងក្នុងករណីណាមួយ។

វិធីងាយៗ៧យ៉ាងដើម្បីមានអាយុវែង និងគ្មានជំងឺ

បើយោង តាមវេជ្ជបណ្ឌិតរោគបេះដូងដ៏ល្បី គឺលោកវេជ្ជបណ្ឌិត Clyde Yancy បានឲ្យដឹងថា មនុស្សអាចរស់នៅបានដល់អាយុ១០០ឆ្នាំ ដោយគ្រាន់តែធ្វើតាមវិធីសាមញ្ញចំនួន៧ប៉ុណ្ណោះ។ ការផ្លាស់ប្ដូរទម្លាប់នៃការរស់នៅ ដូចជារក្សទម្ងន់ឲ្យបានត្រឹមត្រូវ កុំជក់បារី ហើយគ្រប់គ្រងកម្រិតកូឡេស្ទេរ៉ូលក្នុងខ្លួនឲ្យបានល្អ គឺជាវិធីដ៏ងាយស្រួលដែលអាចនាំឲ្យយើងរស់នៅបានអាយុវែង។
ពិតណាស់ប្រសិនបើវែងតែអាយុ តែរាងកាយត្រូវទ្រុធទ្រោមដោយសារជំងឺនោះ ក៏មិនមែនជាអ្វីដែលមនុស្សចង់បាននោះទេ តែវិធីដែលនឹងបង្ហាញខាងក្រោម គឺជាវិធីធ្វើមិនឲ្យមានជំងឺគ្រោះថ្នាក់មកបៀតបៀនយើងបាន។ លោកវេជ្ជបណ្ឌិតជំនាញខាងលើនេះ បាននិយាយថា មនុស្សដល់ទៅ៩០ភាគរយដែលធ្វើតាមដំបូន្មានរបស់គាត់ គឺអាចរស់នៅបានដល់៩០ ឆ្នាំ ឬដល់១០០ឆ្នាំ។ វិធីទាំង៧ នោះ គឺអាចកាត់បន្ថយគ្រោះថ្នាក់នៃការកើតជំងឺឃាតករដ៏សាហាវបំផុតក្នុងលោក ដូចជា ជំងឺបេះដូង និងជំងឺទឹកនោមផ្អែមជាដើម។
ខាងក្រោមនេះ គឺជាវិធីងាយៗសាមញ្ញទាំង៧ ដែលណែនាំដោយវេជ្ជបណ្ឌិត Clyde Yancy ៖
១- បញ្ចេញសកម្មភាពរាងកាយ ៖ បើនិយាយឲ្យស្រួលស្ដាប់គឺការហាត់ប្រាណ។ ការធ្វើឲ្យរាងកាយមានសកម្មភាព គឺអាចជួយបង្កើនជីវិតមនុស្សលើសអាយុសង្ឃឹមរស់ដល់ទៅជិត៤ឆ្នាំឯណោះ។ មនុស្សដែលអត់សូវបញ្ចេញសកម្មភាព ឬអត់ហាត់ប្រាណ គឺនឹងប្រឈមនឹងហានីភ័យនៃជំងឺបេះដូង ឬដាច់សរសៃឈាមក្នុងខួរក្បាល (ស្រ្ដូក) ដល់ទៅ២ដងលើសអ្នកហាត់ប្រាណ។
២- ដឹង និងចេះគ្រប់គ្រងកម្រិតកូឡេស្ទេរ៉ូល ៖ ការមានកម្រិតកូឡេស្ទេរ៉ូលក្នុងឈាមខ្ពស់ គឺអាចបណ្ដាលឲ្យឈានទៅដល់ការកើតជំងឺបេះដូង (មេឃាតករកំពូល) និងជំងឺស្រ្ដូកបាន ដូច្នេះមិនត្រូវភ្លេចគិតពីរឿងកូឡេស្ទេរ៉ូលក្នុងខ្លួននោះទេ។
៣- ញ៉ាំអាហារដែលមានប្រយោជន៍ចំពោះសុខភាព ៖ ការទទួលទាននូវអាហារដែលមានប្រយោជន៍ចំពោះសុខភាព ដែលរួមមានផ្លែឈើ និងបន្លែ គឺជាវិធីមួយក្នុងចំណោមវិធីដ៏ល្អបំផុតក្នុងការជួយថែរក្សាសុខ ភាពរបស់លោកអ្នក។
៤- ដឹង និងចេះគ្រប់គ្រងសម្ពាធឈាម ៖ ការឡើងសម្ពាធឈាមខ្ពស់ ឬហៅជាសាមញ្ញថាលើសឈាម គឺត្រូវបានគេហៅថា ជាឃាតករដ៏ស្ងៀមស្ងាត់បំផុតមួយ ដោយសារតែវាមិនមានរោគសញ្ញា ឬអាការៈបង្ហាញឲ្យដឹងមុននោះទេ ដែលបានផ្ដាច់យកជីវិតមនុស្សអស់មិនតិចឡើយ។ ការដឹង និងចេះគ្រប់គ្រងសម្ពាធឈាមរបស់ខ្លួនឯងបាន អ្នកអាចកាត់បន្ថយហានីភ័យនៃជំងឺស្រ្ដូកបានដល់ទៅ ៤០ភាគរយ ហើយក៏កាត់បន្ថយការគាំងបេះដូងបានដល់ទៅ ២៥ភាគរយផងដែរ។
៥- ធ្វើឲ្យមានទម្ងន់មួយដែលសមស្របចំពោះសុខភាព និងថែរក្សាទម្ងន់នោះ ៖ មនុស្សស្ទើតែ២ភាគ៣នៅក្នុងប្រទេសអ្នកមាន គឺកំពុងតែប្រឈមមុខនឹងការធាត់លើសទម្ងន់។ ការធាត់លើសទម្ងន់នេះហើយ ដែលជាកត្តាគ្រោះថ្នាក់ដ៏ចម្បងមួយ ដែលធ្វើឲ្យឈានទៅដល់ការកើតជំងឺបេះដូង និងស្រ្ដូក។ ការធាត់លើសទម្ងន់ គឺអាចកាត់បន្ថយអាយុសង្ឃឹមរស់ដល់ទៅ ៤ឆ្នាំឯណោះ។
៦- ការពារជំងឺទឹកនោមផ្អែម ៖ ជំងឺទឹកនោមផ្អែម អាចបង្កើនគ្រោះថ្នាក់ក្នុងការឡើងសម្ពាធឈាមខ្ពស់ ជំងឺដាច់សរសៃឈាម ជាពិសេសវាកាន់តែគ្រោះថ្នាក់មួយកម្រិតទៀត ប្រសិនបើអ្នកមិនបានត្រួតពិនិត្យមើល និងគ្រប់គ្រងកម្រិតជាតិស្កនៅក្នុងឈាម។
៧- ជៀសវាងឲ្យផុតពីថ្នាំជក់ ៖ ពាក់កណ្ដាលនៃអ្នកជក់បារីរយៈពេលយូរ បានស្លាប់មុនអាយុ ដោយសារតែបារីបានបង្កឲ្យកើតជំងឺគ្រោះថ្នាក់ជាច្រើន ដូចជា ជំងឺបេះដូង ជំងឺមហារីកសួត និងជំងឺជាច្រើនទៀត។ ប្រសិនបើអ្នកឈប់ជក់បារីបានកាន់តែឆាប់ នោះហានីភ័យនៃការកើតជំងឺបេះដូង និងជំងឺផ្សេងទៀតបានកាន់តែឆាប់ដែរ។

ទឹកសណ្ដែក

ការ រកឃើញថ្មីមួយរបស់ក្រុមអ្នកស្រាវជ្រាវបានបង្ហាញថា ប្រតេអ៊ីនដែលមាននៅក្នុងទឹកសណ្ដែក គឺពិតជាល្អជាងប្រតេអ៊ីនដែលមាននៅក្នុងទឹកដោះគោ ដោយសារវាអាចបង្កើនកម្រិតកូឡេស្ទេរ៉ូល HDL (កូឡេស្ទេរ៉ូលល្អ) ដើម្បីជួយទ្រទ្រង់សុខភាពរបស់យើងម្នាក់ៗ ព្រមទាំងអាចកាត់បន្ថយកម្រិតតេលិកាឈាម (blood lipids) ផងដែរ។ លោកវេជ្ជបណ្ឌិត Elaine Krul ដែលជាសហប្រធានក្រុមអ្នកស្រាវជ្រាវនេះ បានបញ្ជាក់ថា ជំងឺបេះដូង គឺជាជំងឺដែលជាប់លេខមួយក្នុងនាមជាអ្នកសម្លាប់មនុស្សច្រើនជាងគេ លើលោក។ ការកាត់បន្ថយកម្រិតតេលិកាឈាម គឺស្មើនឹងការកាត់បន្ថយហានីភ័យនៃការកើតជំងឺបេះដូង និងជំងឺស្រ្ដូក ដូច្នេះប្រតូអ៊ីនដែលមានក្នុងទឹកសណ្ដែកគឺពិតជាអាចកាត់បន្ថយគ្រោះ ថ្នាក់នៃការកើតជំងឺដ៏សាហាវទាំងពីរនេះបានផងដែរ។
ក្រុមអ្នកជំនាញដែលមកពីសាកលវិទ្យាល័យ Mississippi, សាកលវិទ្យាល័យ Tulane និងKaiser Permanente Southern California បានធ្វើការវិភាគទៅលើទិន្នន័យដែលបានមកពីការសិក្សាលើមនុស្សពេញ វ័យដែលមានសុខភាពល្អនៅអាមេរិកចំនួន ៣៥២នាក់ ដែលមានអាយុជាមធ្យម ៤៧,៧ឆ្នាំ។
ក្រោយពីបានធ្វើការតាមដានលើការសិក្សានេះរយៈពេល៥ឆ្នាំ ក្រុមអ្នកស្រាវជ្រាវបានរកឃើញថាប្រតេអ៊ីនក្នុងទឹកសណ្ដែកគឺធ្វើ ឲ្យមានការកើនឡើងកូឡេស្ទេរ៉ូល HDL ចំនួន ១,៥៤mg/dl ខណៈដែល ប្រតេអ៊ីនដែលមានក្នុងទឹកដោះគោ គឺបែរជាកាត់បន្ថយកូឡេស្ទេរ៉ូល HDL ដែលល្អនេះចំនួន ១,១៣ mg/dl ទៅវិញ។
លោកវេជ្ជបណ្ឌិត Krul បានបញ្ជាក់ផងដែរថា ប្រសិនបើអ្នកផ្លាស់ប្ដូរទម្លាប់រស់នៅប្រចាំថ្ងៃ ដោយទទួលទានទឹកសណ្ដែកជាប្រចាំ នោះវានឹងនាំមកនូវផលវិជ្ជមានចំពោះសុខភាពរបស់លោកអ្នក។
ការស្រាវជ្រាវនេះ ក៏នឹងបន្ដឲ្យឃើញថា ប្រតេអ៊ីនទឹកសណ្ដែក អាចជួយកាត់បន្ថយកម្រិតកូឡេស្ទេរ៉ូល LDL (កូឡេស្ទេរ៉ូលមិនល្អ) ដែលជាអ្នកបង្កជំងឺបេះដូង។
ក្រោយពីរកឃើញ ការសិក្សានេះត្រូវបានគេបោះពុម្ភផ្សាយនៅក្នុងព្រឹត្តប័ត្រ European Journal of Clinical Nutrition។

ឲ្យក្មេងលេងនៅខាងក្រៅអាចកាត់បន្ថយជំងឺមីញ៉ូប

ការ សិក្សាថ្មីមួយនៅសកលវិទ្យាល័យ Cambridge ប្រទេសអង់គ្លេសដោយលោក Justin Sherwin បានរកឃើញថាការចំណាយពេលវេលានៅខាងក្រៅផ្ទះគឺជួយឲ្យក្មេងៗ កាត់បន្ថយការកើតជំងឺ មីញ៉ូបភ្នែក។

យើងបានឃើញហើយថាមានក្មេងជាច្រើនកំពុងតែកើតជំងឺ មីញ៉ូបភ្នែក ជាពិសេសនៅក្នុងទីក្រុងធំៗតែម្តង ក្នុងនោះទីក្រុងភ្នំពេញក៏មានក្មេងៗដែលមីញ៉ូបភ្នែកកើនទ្បើង ច្រើនដែរ ជាពិសេសសិស្សសាលា។ ប៉ុន្តែបើយើងក្រលេកមើលទៅតាមទីជនបទវិញ គឺក្មេងៗមិនសូវមានជំងឺមីញ៉ូបភ្នែកកើនទ្បើងច្រើនទេ។

នេះបញ្ជាក់ថា ការសិក្សាថ្មីនេះគឺពិតជាត្រឹមត្រូវណាស់ ពីព្រោះនៅក្នុងទីក្រុង ក្មេងៗភាគច្រើនមិនសូវជាចេញទៅក្រៅប៉ុន្មានទេ ហើយភាគច្រើនគេចំណាយពេលនៅក្នុងផ្ទះ ឬនៅបន្ទប់រៀន ខុសគ្នាពីក្មេងនៅជនបទ ពួកគេចំណាយពេលច្រើននៅទីវាល។

ការសិក្សានេះគេបាន ពន្យល់ថា កាលណាក្មេងៗមើលទៅវត្ថុទាំងទ្បាយណាដែលមានចំងាយឆ្ងាយពីភ្នែក ក្មេងនោះនឹងអាចកាត់បន្ថយជំងឺមីញ៉ូបភ្នែកបាន ហើយពន្លឺធម្មជាតិដែលបានមកពីពន្លឺព្រះអាទិត្យក៏ជាកត្តាដ៏ សំខាន់សម្រាប់សុខភាពភ្នែករបស់ក្មេងៗដែរ។

បើយើងគិតឲ្យបានស៊ីជម្រៅនោះ យើងនឹងឃើញថា កាលណាក្មេងនៅក្នុងផ្ទះច្រើន ភ្នែករបស់វានឹងទទួលបានពន្លឺមិនគ្រប់គ្រាន់ ដូចនេះវាអាចមើលរបស់ផ្សេងៗស្រវាំងមិនច្បាស់ ហើយកាលណាវានៅក្នុងផ្ទះច្រើន គឺវាអាចមើលទូរទស្សន៍ច្រើន ឬក៏ប្រើកុំព្យូទ័រច្រើន ឬក៏ប្រើប្រាស់ទូរសព្ទទំនើបច្រើនម៉ោង ដែលកត្តាទាំងនេះសុទ្ធតែអាចធ្វើឲ្យភ្នែករបស់ពួកវាអាចនឹងឆាប់ ខូចភ្នែក ហើយក្លាយជាមីញ៉ូម។

ដូចនេះយើងគួរឲ្យក្មេងនៅខាងក្រៅផ្ទះឲ្យបានច្រើន ជាពិសេសនៅពេលថ្ងៃដើម្បីឲ្យភ្នែករបស់ទទួលពន្លឺធម្មជាតិបានច្រើន តែយើងត្រូវចងចាំថា ពន្លឺថ្ងៃអាចធ្វើឲ្យក្មេងមានជំងឺមហារីកស្បែកបាន។

ទទួលពន្លឺថ្ងៃ ក្នុងកំរឹតសមស្របណាមួយ គឺពិតជាល្អសម្រាប់សុខភាពរបស់អ្នក ហើយភ្នែករបស់អ្នកក៏ល្អដែរ។

គេងមិនលក់ បង្កើនគ្រោះថ្នាក់នៃជំងឺគាំងបេះដូង

ការ គេងមិនលក់ គឺស្ទើតែកើតមានឡើងលើមនុស្សគ្រប់គ្នាទៅហើយ ជាពិសេសគឺចាស់ៗ ដែលវាបានបង្កផលវិបាកយ៉ាងច្រើន។ ជាងនេះទៅទៀត ការស្រាវជ្រាវថ្មីមួយបានបញ្ជាក់ថា វាក៏ជាអ្នកបង្កឲ្យកើតជំងឺគាំងបេះដូងផងដែរ។
ការសិក្សាដែលទើបតែបញ្ចប់កាលពីពេលថ្មីៗនេះ បានរកឃើញថា អ្នកដែលគេងមិនលក់ នឹងប្រឈមមុខនឹងហានីភ័យដ៏ខ្ពស់នៃជំងឺគាំងបេះដូង ពោលគឺលើសអ្នកដែលគេងលក់ធម្មតាដល់ទៅ ៤៥ភាគរយឯណោះ។
លោកវេជ្ជបណ្ឌិត Lars Erik Laugsand មកពីសាកលវិទ្យាល័យ Norwegian University of Science and Technology នៅប្រទេសណ័រវេ ហើយក៏ជាអ្នកដឹកនាំការស្រាវជ្រាវនេះ បាននិយាយថា បញ្ហានៃការគេងមិនលក់ គឺបានក្លាយជារឿងសាមញ្ញទៅហើយ ហើយវាក៏មិនពិបាកក្នុងការព្យាបាលដែរ តែយ៉ាងណាក៏ដោយមនុស្សគ្រប់រូបត្រូវតែដឹងពីទំនាក់ទំនងរវាងការ គេងមិនលក់នេះ ជាមួយនឹងជំងឺគាំងបេះដូង ហើយត្រូវពិភាក្សាជាមួយគ្រូពេទ្យប្រសិនបើអ្នកកំពុងតែគេងមិនលក់ មែននោះ។
ការសិក្សាដែលបោះពុម្ភផ្សាយនៅក្នុងព្រឹត្តបត្រ Journal of the American Heart Association នេះ បានធ្វើការពិនិត្យលើហានីភ័យនៃជំងឺគាំងបេះដូងចំពោះអ្នកដែលគេង មិនលក់ ហើយប្រៀបធៀបជាមួយនឹងអ្នកគេងលក់ធម្មតា។
ជាលទ្ធផល ក្រុមអ្នកស្រាវជ្រាវបានរកឃើញថា អ្នកដែលពិបាកក្នុងការគេងលក់ស្ទើតែរៀងរាល់យប់ក្នុងមួយខែចុង ក្រោយ បានប្រឈមមុខនឹងគ្រោះថ្នាក់នៃជំងឺដ៏សាហាវនេះដល់ទៅ ៤៥ភាគរយឯណោះ។
ការសិក្សានេះ បានធ្វើឡើងចំពោះមនុស្សពេញវ័យជាជនជាតិណ័រវេ ចំនួន ៥២៦១០នាក់។ ក្រុមអ្នកស្រាវជ្រាវបានធ្វើការវិភាគលើទិន្នន័យរបស់មន្ទីរពេទ្យ ដើម្បីចេញជាលទ្ធផលដូចខាងលើនោះ។
លើសពីនេះទៀត គេក៏បានរកឃើញដែរថា ៣៣ភាគរយក្នុងចំណោមប្រជាជនណ័រវេទាំងអស់ បានកើតជំងឺគេងមិនលក់នេះ។
អ្វីដែលធ្វើឲ្យការសិក្សានេះកាន់តែអាចជឿបាននោះ គឺដោយសារតែមានការសិក្សាមុននេះជាច្រើនទៀត ក៏បានរកឃើញស្រដៀងគ្នានេះដែរ ពោលគឺគេងមិនលក់ នឹងប្រឈមមុខនឹងជំងឺលើសឈាម និងគាំងបេះដូង។
សរុបមកវិញ ប្រសិនបើអ្នកជួបប្រទះនូវបញ្ហាគេងមិនសូវលក់នាពេលយប់ ចាំបាច់ត្រូវជួបពេទ្យ ដើម្បីរកដំណោះស្រាយ ព្រោះជំងឺគាំងបេះដូង គឺជាជំងឺដ៏សាហាវ ប្រៀបបានឃាតករស្ងៀមស្ងាត់មួយអញ្ចឹង។

ផឹកស្រា ក៏ធ្វើឲ្យកើតមហារីកសួតដែរ!

សូម ប្រយ័ត្នចំពោះអ្នកដែលចូលចិត្តគ្រឿងស្រវឹង ព្រោះថាវាមិនត្រឹមតែបង្កឲ្យកើតមហារីកថ្លើមដូចអ្នកទាំងអស់ គ្នាធ្លាប់បានដឹងនោះទេ ប៉ុន្ដែវាក៏អាចបង្កឲ្យកើតមហារីកសួតផងដែរ បើតាមការរកឃើញថ្មីមួយរបស់ក្រុមអ្នកស្រាវជ្រាវ។
ការសិក្សាដ៏ថ្មីបំផុតនេះ បានរកឃើញថាការទទួលទានគ្រឿងស្រវឹងច្រើនពេក ឬ និយាយឲ្យស្រួលស្ដាប់ថា ផឹកទាល់តែស្រវឹង គឺនឹងអាចអភិវឌ្ឍទៅរកការកើតជំងឺមហារីកសួត។
ក្រុមអ្នកស្រាវជ្រាវដែលមកពីកាលីហ្វ័រញ៉ា សហរដ្ឋអាមេរិកនេះ បានធ្វើការវិភាគទៅលើទិន្នន័យសុខភាពដែលបានកត់ត្រាទុកចំនួន ១២៦២៩៣នាក់ ចាប់ពីឆ្នាំ ១៩៧៨ ដល់ឆ្នាំ២០០៨។ គ្រប់អ្នកចូលរួមទាំងអស់ ត្រូវតម្រូវឲ្យប្រាប់ពីការជក់បារី ការផឹកគ្រឿងស្រវឹង និងទិន្នន័យផ្ទាល់ខ្លួនជាច្រើនទៀត។
កំឡុងពេលនៃការតាមដានក្នុងការសិក្សានេះ អ្នកចូលរួមប្រមាន ១៨៥២នាក់ បានកើតមហារីកសួត។
ស្របពេលដែល បារីគឺជាភ្នាក់ងារដ៏ខ្លាំងបំផុតក្នុងការបង្កឲ្យកើតមហារីកសួត នោះ ការផឹកគ្រឿងស្រវឹងច្រើនក៏អាចបង្កើនហានីភ័យនៃការកើតជំងឺនេះផង ដែរ។
បន្ថែមលើនេះទៀត ការផឹកស្រា គឺមានគ្រោះថ្នាក់ខ្លាំងជាងស្រាបៀបើគិតលើការវិវឌ្ឍទៅរកជំងឺមហារីកសួត។
លោក Stanton Siu ដែលជាអ្នកដឹកនាំការស្រាវជ្រាវនេះបាននិយាយបញ្ជាក់ថា ការញ៉ាំស្រាច្រើនពេក គឺនឹងបង្កជាផលប៉ះពាល់ច្រើនណាស់ ទាក់ទងនឹងជំងឺបេះដូង ជំងឺថ្លើម ហើយពេលនេះគឺជំងឺមហារីកសួតមួយទៀត។
ទន្ទឹមនឹងគ្នានេះដែរ ប្រសិនបើអ្នកចង់ការពារខ្លួនប្រឆាំងនឹងជំងឺមហារីកសួត ក៏អាចធ្វើបានដែរ ពោលគឺញ៉ាំតែខ្មៅ និងផ្លែឈើ។ ការអះអាងបែបនេះ គឺយោងតាមការស្រាវជ្រាវមួយផ្សេងទៀត របស់ក្រុមអ្នកវិទ្យាសាស្រ្ដដែលមកពីសាធារណៈរដ្ឋឆែក។
ជាចុងក្រោយ អ្វីដែលអ្នកជំនាញចង់បញ្ជាក់ប្រាប់ដែរនោះ គឺត្រូវកាត់បន្ថយការទទួលទានជាតិអាល់កុលឲ្យបានសមល្មម ដើម្បីការពារខ្លួនពីជំងឺសាហាវៗនានា ក៏ដូចជាការពារសុវត្ថិភាពផ្ទាល់ខ្លួនផងដែរ។

អាហារឆ្លាតវៃទាំង៦ ជួយឲ្យអ្នកមានសុខភាពល្អ!

អាហារ ទាំង៦ ប្រភេទ ដែលត្រូវបានគេចាត់ទុកជាអាហារវ័យឆ្លាត សម្រាប់ការរស់នៅប្រកបដោយសារសុខភាពល្អនេះ គឺល្អជាងឱសថទៅទៀត ដោយសារតែឱសថជាអាវុធមុខពីរ តែពួកវាទាំង៦ ដែលប្រិយមិត្តនឹងឃើញខាងក្រោមនេះ គឺមិនមានផលប៉ះពាល់សុខភាពនោះទេ។ ជាមួយនឹងសារធាតុពីធម្មជាតិដែលអាចជម្រុញប្រព័ន្ធភាពស៊ាំប្រឆាំង នឹងជំងឺ វានឹងផ្ដល់ឲ្យលោកអ្នកនូវសុខភាពល្អប្រសើរ។
អាហារទាំង៦ប្រភេទនោះ មានដូចខាងក្រោម៖
១- អាហារបៃតង
ពាក្យថាអាហារបៃតងនៅទីនេះ គឺសំដៅលើបន្លែដែលមានស្លឹកពណ៌បៃតង ដែលពួកវាមាន ១០០កាឡូរីក្នុងមួយ ដែលជាជម្រើសល្អបំផុតសម្រាប់សម្រកទម្ងន់។ បន្លែបៃតង ក៏ផ្ទុកទៅដោយប្រភពល្អៗដ៏សំបូរបែបដូចជា ហ្វៃប៊ើ អាស៊ីតហ្វូលីច វីតាមីនសេ ប៉ូតាស្យូម និងម៉ាញ៉េស្យូមផងដែរ។
សារធាតុទាំងនោះ អាចជួយការពារប្រឆាំងនឹងជំងឺមហារីក និងជំងឺបេះដូង។ បន្ថែមលើនេះទៀត ពួកវាក៏មាន សារធាតុប្រឆាំងអុកស៊ីតកម្មទៀតផង ដូចជា Lutein និង Zeaxanthin ដែលជួយការពារភ្នែកឲ្យភ្លឺច្បាស់។
បើយោង តាមការសិក្សាផ្សេងៗជាច្រើន បានឲ្យដឹងថា ការទទួលទានបន្លែបៃតងមួយថ្ងៃឲ្យបានម្ដង គឺនឹងជួយកាត់បន្ថយជំងឺបេះដូងបាន ១១ភាគរយ ហើយប្រសិនបើញ៉ាំលើសពីម្ដងឡើងទៅ នោះវាក៏នឹងកាត់បន្ថយហានីភ័យនៃជំងឺទឹកនោមផ្អែមបាន ៩ភាគរយផងដែរ។ បន្លែស្លឹកបៃតង ក៏ជាប្រភពនៃជាតិដែក និងកាល់ស្យូម ដែលសំខាន់សម្រាប់ជំនួយឆ្អឹងលោកអ្នកផងដែរ។
២- ខ្ទឹមបារាំង
ប៉ុន្មានថ្ងៃមុននេះ លោកអ្នកបានដឹងរួចមកហើយថា ខ្ទឹមបារាំងក៏ស្ថិតក្នុងចំណោមអាហារដែលធ្វើឲ្យអ្នកមានក្លិនមិន ល្អ ប៉ុន្ដែទន្ទឹមនឹងចំណុចអវិជ្ជមានតូចមួយនេះ ខ្ទឹមបារាំងក៏មានអត្ថប្រយោជន៍ច្រើនណាស់ដែរ។ ខ្ទឹមបារាំង ជាប្រភពដ៏ល្អបំផុត ដែលជួយការពារលោកអ្នកឲ្យជៀសផុតពីជំងឺមហារីកក្រពេញប្រូស្ដាត។ លើសពីនេះទៀត ដោយមានផ្សំទៅដោយសារធាតុប្រឆាំងអុកស៊ីតកម្មខ្ពស់ គឺ Quercetin ខ្ទឹមបារាំង នឹងកាត់បន្ថយកោសិកាដែលងាប់ក្នុងករណីកើតមហារីកពោះវៀន។
៣- ផ្សិត
យោង តាមការសិក្សាថ្មីបំផុតមួយ បានរកឃើញថា ការញ៉ាំផ្សិត១០ក្រាម ក្នុងមួយថ្ងៃ នឹងជួយកាត់បន្ថយគ្រោះថ្នាក់នៃការកើតមហារីកសុដន់ ដល់ទៅ៦៤ភាគរយ។ ជាងនេះទៅទៀត ប្រសិនបើអ្នក ញ៉ាំតែបៃតងមួយពែង ជាមួយនឹងផ្សិត ជារៀងរាល់ថ្ងៃ ក៏នឹងជួយកាត់បន្ថយជំងឺដ៏សាហាវនេះ រហូតដល់ ៨៩ភាគរយឯណោះ។
ផលប្រយោជន៍ផ្សេងទៀតរបស់ផ្សិត រួមមាន ជួយពង្រឹងប្រព័ន្ធភាពស៊ាំ និងការពារការខូចខាត DNA ផងដែរ។
៤- ប៊ើរី
ដូច ដែលប្រិយមិត្តធ្លាប់បានអានក្នុងអត្ថបទសុខភាពមុនៗរបស់ខ្មែរ សារិកាមកហើយថា ពពួកផ្លែប៊ើរី គឺមានច្រើនប្រភេទ ដូចជាស្រ្ដ័រប៊ើរី ប៊្លូប៊ើរី និងប៊្លែកប៊ើរីជាដើម ហើយពួកវា សុទ្ធតែមានសារធាតុប្រឆាំងអុកស៊ីតកម្មដូចគ្នា ដែលនឹងជួយលោកអ្នកជៀសផុតពីជំងឺផ្សេងៗបាន។
លើសពីនេះទៅទៀត ផ្លែប៊ើរី ក៏នឹងជួយបង្កើនការចងចាំ និងជម្រុញសកម្មភាពក្នុងខួរក្បាលបានទៀតផង។
៥- សណ្ដែក
សណ្ដែក គឺជាប្រភពដ៏ល្អបំផុត នៃកាបូហ៊ីដ្រាត ហើយក៏អាចការពារជំងឺទឹកនោមផ្អែមបានផងដែរ។ ការទទួលទានសណ្ដែក ឲ្យបានយ៉ាងតិច ពីរដងក្នុងមួយសប្ដាហ៍ គឺនឹងជួយកាត់បន្ថយឱកាសនៃជំងឺមហារីកពោះវៀន ដល់ទៅ៥០ភាគរយ។
៦- គ្រាប់ធញ្ញជាតិ
គ្រាប់ ធញ្ញជាតិ មានផ្ទុកទៅដោយសារធាតុមានប្រយោជន៍ជាច្រើន ដូចជាសារធាតុរ៉េ និងសារធាតុប្រឆាំងអុកស៊ីតកម្មជាច្រើនទៀត។
គ្រាប់ធញ្ញជាតិដែលល្អ រួមមាន គ្រាប់ផ្កាឈូករ័ត្ន និង គ្រាប់ល្ពៅជាដើម។ គ្រាប់ផ្កាឈូករ័ត្នមានផ្ទុកទៅដោយ ប្រូតេអ៊ីន និងជាតិរ៉ែ, គ្រាប់ ខណៈដែលគ្រាប់ល្ពៅ មានជាតិដែក កាល់ស្យូម និងសង្កសី។

ស្រ្ដរប៊ើរី អាចជំនួយក្រពះរបស់អ្នកផឹកគ្រឿងស្រវឹង

ប្រសិន បើអ្នកជាមនុស្សចូលចិត្តទទួលទានគ្រឿងស្រវឹង នេះគឺជាដំណឹងល្អថ្មីមួយសម្រាប់លោកអ្នក។ យោងតាមការរកឃើញថ្មីមួយរបស់ក្រុមអ្នកស្រាវជ្រាវ បានបង្ហាញថា ការញ៉ាំផ្លែស្រ្ដរប៊ើរី ឬផឹកទឹកផ្លែស្រ្ដរប៊ើរី នឹងជួយកាត់បន្ថយផលប៉ះពាល់របស់គ្រឿងស្រវឹងចំពោះក្រពះរបស់អ្នកបាន ។
ប្រិយមិត្តទាំងអស់គ្នាប្រហែលជាដឹងហើយថា ការផឹកគ្រឿងស្រវឹង គឺពិតជាមិនល្អនោះទេសម្រាប់ក្រពះរបស់យើង ដែលនេះគឺដោយសារជាតិអេតាណុល ដែលមាននៅក្នុងគ្រឿងស្រវឹងទាំងនោះ បានបំផ្លាញក្រពះ រហូតឈានដល់ការកើតជំងឺរលាកក្រពះទៀតផង។
ដើម្បីរកឲ្យឃើញពីផលប្រយោជន៍នៃស្រ្ដរប៊ើរីក្នុងការការពារ ក្រពះ ដែលបណ្ដាលមកពីគ្រឿងស្រវឹង ក្រុមអ្នកស្រាវជ្រាវដែលមកពីអ៊ីតាលី ស៊ើប៊ី និងអេស្ប៉ាញ បានធ្វើការពិសោធន៍ទៅលើសត្វកណ្ដុរ។ ក្នុងកំឡុងពេល១០ថ្ងៃ កណ្ដុរសម្រាប់ពិសោធន៍ទាំងនោះ ត្រូវគេផ្ដល់ឲ្យនូវផ្លែស្រ្ដរប៊ើរី ៤០ក្រាមក្នុងមួយថ្ងៃ មុនពេលបញ្រ្ចកស្រាចូល។
ក្រោយពីរយៈពេល១០ថ្ងៃនេះ ក្រុម អ្នកស្រាវជ្រាវបានរកឃើញថា សត្វកណ្ដុរភាគតិចណាស់ដែលកើតជំងឺរលាកក្រពះ បើប្រៀបធៀបជាមួយនឹងកណ្ដុរដែលមិនទទួលបានផ្លែស្រ្ដរប៊ើរី។
ឆ្លើយតបចំពោះការរកឃើញនេះ លោក Sara Tulipani មកពីសាកលវិទ្យាល័យបាសេឡូណា ដែលជាអ្នកដឹកនាំការសិក្សានេះ បាននិយាយថា ផលវិជ្ជមានរបស់ស្រ្ដរប៊ើរី គឺមិនត្រឹមតែមានសារធាតុប្រឆាំងអុកស៊ីតកម្មប៉ុណ្ណោះទេ ប៉ុន្ដែធាតុពិតវាថែមទាំងអាចការពាររាងកាយយើងពីជំងឺបានទៀតផង ។
គូរបញ្ជាក់ផងដែរថា ការសិក្សានេះមិនបានរកឃើញថា ស្រ្ដរប៊ើរីអាចជួយកាត់បន្ថយភាពស្រវឹងបាននោះទេ គ្រាន់តែអាចជួយដល់ក្រពះដែលកំពុងលិចលង់ក្នុងសុរាប៉ុណ្ណោះ។

ទឹកនោមផ្អែមកើនឡើងពីរដងដោយសារធាត់

អ្នកដែលធាត់

ចំនួន នៃអ្នកកើតជំងឺទឹកនោមផ្អែមបានកើនឡើងយ៉ាងលឿននៅទូទាំងពិភពលោក ជាពិសេសនៅប្រទេសអ្នកមាន។ នៅចក្រភពអង់គ្លេស ជំងឺនេះបានកើនឡើងដល់ទៅ ៥០ភាគរយ គ្រាន់តែក្នុងរយៈពេល៥ឆ្នាំប៉ុណ្ណោះ ដែលភាគច្រើនគឺបណ្ដាលមកពីការធាត់លើសទម្ងន់។ មនុស្សពេញវ័យ និងកុមារនៅអង់គ្លេសប្រមាណ៣លាននាក់ បានរងគ្រោះដោយសារជំងឺទឹកនោមផ្អែម ដែលនេះស្មើនឹងការកើនឡើង ១១៧០០០នាក់ ក្នុងរយៈពេល១២ខែចុងក្រោយ។
ក្រុមមូលនិធិទឹកនោមផ្អែមប្រចាំចក្រភពអង់គ្លេសបានធ្វើការ ព្រមានថា ទឹកប្រាក់ជាច្រើនពាក់លានដុល្លារ ត្រូវបានចំណាយជារៀងរាល់ឆ្នាំ ដើម្បីព្យាបាលអ្នកជំងឺ ដែលនេះស្ទើតែស្មើនឹងមួយភាគដប់ នៃទឹកប្រាក់ដែលចំណាយលើជំងឺផ្សេងៗ។
៩០ភាគរយនៃអ្នករងគ្រោះដោយសារជំងឺនេះ គឺប្រភេទជំងឺទឹកនោមផ្អែមប្រភេទ២ ដែលបណ្ដាលមកពីការធាត់លើសទម្ងន់ ឬធាត់ជ្រុល។
សល់ប្រមាណ ១០ភាគរយទៀតតែប៉ុណ្ណោះ ដែលរងគ្រោះដោយសារទឹកនោមផ្អែមប្រភេទ ១ ដែលកើតតាមរយៈហ្សែន មិនមែនដោយសារធាត់ជ្រុលនោះទេ។
កាលពីដើមឆ្នាំកន្លងទៅ របាយការណ៍ពីរផ្សេងគ្នាបានព្រមានអំពីការកើនឡើងយ៉ាងគំហុគនៃកុមា ដែលប្រឈមនឹងទឹកនោមផ្អែមប្រភេទពីរ ដែលកាលពីមុនមានតែមនុស្សពេញវ័យតែប៉ុណ្ណោះដែលកើតជំងឺនេះ។
ទិន្នន័យពីការស្រាវជ្រាវបានបង្ហាញថា កុមារ ១៤០០នាក់ បានកើតទឹកនោមផ្អែមប្រភេទ២ ដែលផ្ទុយពីទសវត្សមុន ដែលមិនមាននោះទេ។
ក្រុមអ្នកជំនាញខាងសុខភាពបានត្អូញត្អែរថា ការកើនឡើងនៃកម្រិតនៃការធាត់ ដែលបណ្ដាលមកពីការញ៉ាំអាហារមិនត្រឹមត្រូវ និងការមិនហាត់ប្រាណ។ ជិតមួយភាគបួននៃមនុស្សពេញវ័យ និងមួយភាគប្រាំនៃកុមារអាយុខ្ទង់១០ឆ្នាំ គឺកំពុងតែស្ថិតក្នុងសភាពធាត់។
លើសពីនេះទៅទៀត អ្នកដែលកើតទឹកនោមផ្អែម ក៏នឹងត្រូវប្រឈមមុខនឹងហានីភ័យនៃការកើតជំងឺបេះដូង និងស្រ្ដូកដល់ទៅ៥ដង លើសអ្នកដែលមិនកើតទៀតផង។

អ្នក ប្រហែលជាដឹងមកហើយថាផ្លែឈើមានអត្ថប្រយោជន៍ច្រើនណាស់សម្រាប់ សុខភាពយើងម្នាក់ៗ ប៉ុន្ដែភាគច្រើនមិនបានដឹងពីអត្ថប្រយោជន៍របស់វាថាមានអ្វីខ្លះ នោះទេ ដោយសារតែមិនបានគិតដល់។
ក្រៅពីបន្ថែមរសជាតិសម្រាប់អាហារប្រចាំថ្ងៃ ផ្លែឈើគឺមានកាឡូរីទាប ហើយមានសារធាតុចិញ្ចឹម វីតាមីន និងសារជាតិរ៉ែជាច្រើនទៀត។ ការញ៉ាំផ្លែឈើ អាចជួយឲ្យយើងក្មេងជាងវ័យ មានថាមពល ជៀសផុតពីជំងឺ និងបង្កើនសម្រស់ឲ្យកាន់តែស្រស់ស្អាត។
ខាងក្រោមនេះ គឺជាអត្ថប្រយោជន៍៥យ៉ាង ដែលអ្នកប្រហែលជាមិនធ្លាប់គិតដល់៖
១- ជំនួយសក់ ព្យាបាលសក់ខូច
អ្នកប្រហែលជាធ្លាប់អានអត្ថបទសុខភាពរបស់ខ្មែរសារិកានាពេល កន្លងមកដែលនិយាយអំពីអត្ថប្រយោជន៍នៃផ្លែប៉ោមរួចមកហើយ ប៉ុន្ដែនាពេលនេះអ្នកនឹងដឹងបន្ថែមទៀតថា ផ្លែប៉ោមអាចជួយជម្រុញការលូតលាស់សក់របស់អ្នកបានផងដែរ។
យោងតាមក្រុមអ្នកជំនាញបានឲ្យដឹងថា សារធាតុប៉ូលីហ្វេណុល ឬប្រូស៊ីយ៉ានីឌីន បេ-2 ដែលមាននៅក្នុងផ្លែប៉ោម អាចជួយធ្វើឲ្យសក់លោកអ្នកលូតលាស់បានល្អ ព្រមទាំងជួយព្យាបាលបញ្ហាអង្គែបានទៀតផង។
២- ព្យាបាលមុខមុន
ផ្លែស្រ្ដរប៊ើរ មិនត្រឹមតែមានប្រយោជន៍ចំពោះសុខភាពជាច្រើននោះទេ ប៉ុន្ដែវាក៏អាចជួយព្យាបាលបញ្ហាមុខកើតមុនបានទៀតផង។ ផ្លែស្រ្ដរប៊ើរី មានផ្សំទៅដោយ អាស៊ីតអាល់ហ្វាហ៊ីដ្រុកស៊ី ដែលជួយកំចាត់កោសិកាដែលខូច។ មិនត្រឹមតែប៉ុណ្ណោះទេ ស្រ្ដរប៊ើរីក៏មានសារធាតុប្រឆាំងនឹងជំងឺមុនដ៏ខ្លាំងក្លាផងដែរ កំចាត់នូវស្នាមលើមុខ និងជួយថែរក្សាស្បែកឲ្យរលោង។
បន្ថែមលើនេះទៀត ស្រ្ដរប៊ើរី ក៏ជួយសម្អាតនូវប្រព័ន្ធរំលាយអាហារ ដែលជួយកំចាត់ជាតិពុលចេញពីរាងកាយរបស់យើង ដែលស្មើនឹងការកំចាត់ភ្នាក់ងារចម្លងជំងឺមុនដែរ។ វាក៏ជួយថែរក្សាជាតិទឹកនៅក្នុងខ្លួន ជួយឲ្យស្បែកមានសំណើម។
យោងតាមជនជាតិអេហ្ស៊ីបបុរាណ ការយកស្រ្ដរប៊ើរីយកមកបិតជាប់នឹងផ្ទៃមុខ អាចជួយកំចាត់មុនបាន។ អ្នកក៏អាចសាកល្បងតាមវិធីបុរាណនេះផងដែរ។
៣- ធ្វើឲ្យឆ្អឹងរឹងមាំ
ការបន្ថែមផ្លែម្នាស់ទៅក្នុងអាហារប្រចាំថ្ងៃរបស់អ្នក គឺពិតជាផ្ដល់ផលល្អឲ្យលោកអ្នកជាក់ជាពុំខាន។ ផ្លែម្នាស់ មានជាតិម៉ង់កាណេស ដែលជាសារធាតុរ៉ែដែលចាំបាច់សម្រាប់ពង្រឹងឆ្អឹងឲ្យរឹងមាំ។
ការសិក្សាជាច្រើន បានរកឃើញថា អ្នកដែលមានឆ្អឹងមិនរឹងមាំ គឺមានកម្រិតនៃកាល់ស្យូម និងម៉ង់កាណេសទាប ដូច្នេះការញ៉ាំទឹកផ្លែម្នាស់ គឺជាវិធីល្អបំផុតក្នុងការជួយឲ្យឆ្អឹងលូតលាស់បានល្អសម្រាប់ ក្មេងៗ និងធ្វើឲ្យឆ្អឹងរឹងមាំសម្រាប់មនុស្សចាស់។
៤- ជំនួយភ្នែក
ផ្លែទំពាំងបាយជូរ ត្រូវបានគេចាត់ទុកថាជាម្ចាស់ក្សត្រីនៃផ្លែឈើ ដោយសារតែវាមានផ្សំទៅដោយសារធាតុមានប្រយោជន៍ជាច្រើន ព្រមទាំងសារធាតុប្រឆាំងអុកស៊ីតកម្ម ដែលមានឈ្មោះថា proanthocyanidins ដែលអាចជួយកាត់បន្ថយការខូចខាតជាលិកាភ្នែក។
ការស្រាវជ្រាវបានបង្ហាញថា ទំពាំងបាយជូរ អាចជួយឲ្យភ្នែកភ្លឺច្បាស់ កាត់បន្ថយភាពស្រ្ដេសនៃភ្នែក និងការពារភ្នែកឡើងបាយ។ ទឹកទំពាំងបាយជូរ ក៏អាចជួយការពារមិនឲ្យមានស្នាមខ្មៅខាងក្រោមរង្វង់ភ្នែកបានផង ដែរ។
៥- បង្កើនថាមពល
ផ្លែគូលែន ដែលមានន័យថា អំណោយនៃជីវិតដ៏រីករាយ ក្នុងភាសាចិន គឺជាផ្លែឈើមួយប្រភេទដែលឆ្ងាញ់ពិសារ។ ផ្លែនេះអាចជួយជំនួសភេសជ្ជៈបង្កើនថាមពលដែលគេផឹកក្នុងពេលលេង កីឡាបានទៀតផង។
អ្នកលេងកីឡាគួរទទួលទានទឹកផ្លែគូលែន ដោយសារតែវាអាចជួយជម្រុញសុខភាពរាងកាយទាំងមូល ក៏ដូចជាជួយបង្កើនកម្រិតថាមពល។ វាអាចជួយពង្រឹងភាពខ្លាំងនៃរាងកាយ បន្សុទ្ធឈាម និងការពារជំងឺស្រ្ដូក។
សរុបមកវិញ ផ្លែឈើពិតជាមានប្រយោជន៍ច្រើនណាស់ ដែលអ្នកមិនគួរមើលរំលងនោះទេ។ ចាប់ផ្ដើមថ្ងៃថ្មីជាមួយផ្លែឈើណាដែលអ្នកចូលចិត្ត ដើម្បីសុខភាពដ៏ល្អប្រសើរ!

ពិសពីងពាង ក្ដីសង្ឃឹមថ្មីសម្រាប់អ្នកកើតមហារីកសុដន់

ពីងពាង

ជំងឺ មហារីកសុដន់ គឺជាជំងឺមហារីកមួយប្រភេទក្នុងចំណោមជំងឺមហារីកដែលកើតឡើងច្រើន ចំពោះស្រ្ដីនៅទូទាំងពិភពលោក ហើយការសិក្សាជាច្រើនគឺនៅតែមិនទាន់រកឃើញនូវវិធីកំចាត់ជំងឺ សាហាវនេះនៅឡើយទេ។ នៅក្នុងឱកាសនៃខែនៃទិវាជំងឺមហារីកពិភពលោក សាកលវិទ្យាល័យ Western Australia បានរកឃើញនូវវិធីព្យាបាលថ្មីនៃជំងឺនេះហើយ។
ក្រុមអ្នកស្រាវជ្រាវទាំងនេះបានរកឃើញថា ពិសពីងពាង គឺអាចមានប្រសិទ្ធភាពខ្ពស់ក្នុងការកំចាត់នូវកោសិកានៃជំងឺមហារីក សុដន់។ នៅ ក្នុងការសិក្សាដែលធ្វើឡើងរយៈពេល២ឆ្នាំនេះ លោកវេជ្ជបណ្ឌិត David Wilson និងសហការីរបស់គាត់ បានប្រមូលនូវពិសពីងពាងចំនួន ១០ប្រភេទសម្រាប់យកមកពិសោធន៍។
យោងតាមលោកវេជ្ជបណ្ឌិតដដែលនេះ ពិសពីងពាងមានផ្សំទៅដោយម៉ូលេគុល ដែលអាចកំចាត់នូវកោសិកានៃជំងឺមហារីកបាន។ ការអះអាងរបស់លោកវេជ្ជបណ្ឌិតនេះ គឺមិនមែនជាការបញ្ជាក់ជាលើកដំបូងពីប្រយោជន៍នៃពិសពីងពាងនោះទេ ជាក់ស្ដែងការសិក្សាមុនៗនេះ ក៏បានរកឃើញដែរថា ម៉ូលេគុលនៃពិសពីងពាង (ឬពិសខ្ទួយ) អាចយកមកប្រើប្រាស់ក្នុងការព្យាបាលរោគឈឺរ៉ាំរ៉ៃបានទៀតផង។
លោកវេជ្ជបណ្ឌិត Norelle Daly ដែលជាអ្នកជំនាញខាងមហារីកសុដន់ បាននិយាយដែរថា ក្ដីសង្ឃឹមថ្មី គឺពិសក្នុងពីងពាងនឹងអាចជួយអ្នកជំងឺមហារីកសុដន់ ឬក៏អាចសម្លាប់នូវកោសិកាជំងឺនេះបាន។
បន្ថែមលើនេះទៀត ក្រុមអ្នកស្រាវជ្រាវដែលមកពី មជ្ឈមណ្ឌល Peter MacCallum Cancer ក៏បានអភិវឌ្ឍនូវឱសថដែលអាចកំចាត់កោសិកាជំងឺនេះបានដែរ។ ឱសថនេះនឹងអាចរួចរាល់ ហើយបង្ហាញមុខនៅលើទីផ្សារក្នុងរយៈពេល ៥ឆ្នាំទៀត។

ផឹកច្រើនបង្កើនមហារីកក្រពះ!

បុរស ៗដែលចូលចិត្តទទួលទានគ្រឿងស្រវឹងច្រើន ជារៀងរាល់ថ្ងៃ គួរតែកាត់បន្ថយហើយនាពេលនេះ ដោយសារតែការរកឃើញចុងក្រោយបំផុតមួយបានបញ្ជាក់ថា វានឹងបង្កឲ្យកើតជំងឺមហារីកក្រពះ។
ការសិក្សាជាច្រើនបានព្យាយាមស្វែងរកថាតើការផឹកគ្រឿងស្រវឹង ច្រើន អាចបង្កើនហានីភ័យនៃជំងឺមហារីកក្រពះដែរឬក៏អត់ ហើយទីបំផុតលទ្ធផលបានបង្ហាញថា ពិតជាអញ្ចឹងមែន។
ការរកឃើញនេះ គឺបានមកពីការសិក្សាលើមនុស្សពេញវ័យនៅអឺរ៉ុបចំនួន ៥០ម៉ឺននាក់ ដែលជាការសិក្សាដ៏ធំមួយ។
នៅពេលចាប់ផ្ដើមស្រាវជ្រាវដំបូង បុរសជាង ១ម៉ឺននាក់ បានប្រាប់ថាពួកគេផឹកស្រាជាមធ្យម ៤កែវក្នុងមួយថ្ងៃ ហើយជាលទ្ធផលពួកគេបានកើតជំងឺមហារីកក្រពះលើសអ្នកដែលផឹកតិចជាង នេះដល់ទៅពីរដងឯណោះ។
នៅពេលដែលក្រុមអ្នកស្រាវជ្រាវបានធ្វើការតាមដានឲ្យដិតដល់ ជាងនេះ ពួកគេបានរកឃើញថា គ្រឿងស្រវឹងដែលលេចធ្លោជាងគេគឺស្រាបៀ (មានអត្រាបង្កជំងឺមហារីកក្រពះខ្លាំងជាងស្រា)។
ទោះបីជាភាគច្រើនជាបុរសដែលរកឃើញថាកើតជំងឺនេះ ប៉ុន្ដែទំនាក់ទំនងរវាងមហារីកក្រពះ និងការផឹកគ្រឿងស្រវឹងចំពោះស្រ្ដីក៏ស្រដៀងនឹងបុរសដែរ បើតាមការឲ្យដឹងពីវេជ្ជបណ្ឌិត Eric J. Duell ដែលជាអ្នកដឹកនាំការស្រាវជ្រាវនេះ (ស្រ្ដីដែលផឹកគ្រឿងស្រវឹងច្រើនលើសលប់ គឺមិនតិចជាងបុរសឆ្ងាយណាស់ ពោលគឺក្នុងចំណោម១៣០០០នាក់ផឹកច្រើនក្នុងការស្រាវជ្រាវនេះ មានស្រ្ដីតែ ២៣០០នាក់ប៉ុណ្ណោះ)។
ក្រុមអ្នកជំនាញបានធ្វើការសំណូមពរហើយ សំណូមពរទៀត ថាគួរទទួលទានគ្រឿងស្រវឹងឲ្យបានសមល្មមបានហើយ កុំប្រឹងដល់ថ្នាក់ស្រវឹងរាល់ថ្ងៃពេក ពោលគឺជាមធ្យម ២កែវក្នុងមួយថ្ងៃ គឺសមល្មមហើយ ចំណែកឯស្រ្ដីវិញមិនគួរលើសពីមួយកែវក្នុងមួយថ្ងៃនោះទេ។
មិនត្រឹមតែបង្កមហារីកក្រពះនោះទេ ការផឹកគ្រឿងស្រវឹងច្រើនជ្រុល ក៏នឹងបង្កឲ្យកើតមហារីកមាត់ និងបំពង់កផងដែរ បូកបន្ថែមជាមួយអ្វីដែលអ្នកធ្លាប់បានដឹងគឺវា ប៉ះពាល់ថ្លើម និងបង្កជាផលវិបាកជាច្រើនទៀត។
សរុបមកវិញ ការទទួលទានគ្រឿងស្រវឹងច្រើន គឺដូចជាមិនឃើញមានផលល្អអ្វីទេ ក្រៅពីសប្បាយមួយភ្លែតពេលជួបជុំមិត្តភក្ដិ តែបែរជាបង្កជាផលវិបាកជាច្រើនលើសលប់ទៅវិញនោះទេ។

សុភមង្គលជួយឲ្យមានអាយុវែង!

មនុស្ស ដែលធ្វើអារម្មណ៍ឲ្យសប្បាយ និងគិតអ្វីក្នុងផ្លូវវិជ្ជមាន នឹងមានអាយុវែងជាងអាយុសង្ឃឹមរស់ បើយោងតាមអ្នកវិទ្យាសាស្រ្ដមួយក្រុម។
ការអះអាងបែបនេះ គឺដោយសារតែក្រុមអ្នកវិទ្យាសាស្រ្ដទាំងនោះ បានធ្វើការសិក្សារយៈពេល៥ឆ្នាំ ទៅលើមនុស្ស៤ពាន់នាក់ ដែលមានអាយុចន្លោះពី ៥២ទៅ ៧៩ឆ្នាំ។ លទ្ធផលនៃការស្រាវជ្រាវនេះបានបង្ហាញថា អ្នកដែលមានអារម្មណ៍សប្បាយ មានទំនុកចិត្តក្នុងខ្លួន ឬមានគំនិតវិជ្ជមាន បានកាត់បន្ថយកម្រិតស្លាប់មុនអាយុដល់ទៅ ៣៥ភាគរយឯណោះ បើប្រៀបធៀបជាមួយអ្នកដែលមិនសូវសប្បាយចិត្ត។
ការរកឃើញរបស់ University College of London នេះ គឺជាក្ដីសង្ឃឹមថ្មីដែលនឹងជម្រុញឲ្យមនុស្សរស់នៅដោយរីករាយ ជៀសឆ្ងាយពីអារម្មណ៍ស្រ្ដេស មួម៉ៅ ដែលបង្កផលវិបាកចំពោះសុខភាព។
លោក Andrew Steptoe ដែលជាអ្នកដឹកនាំការស្រាវជ្រាវនេះ បានថ្លែងថា ការបង្ហាញពីលទ្ធផលនាពេលនេះ បានផ្ដល់ឲ្យនូវហេតុផលផ្សេងទៀត ក្នុងការរស់នៅប្រកបដោយស្នាមញញឹមសម្រាប់មនុស្សចាស់។
ការសិក្សារយៈពេលវែងនេះ បានគាំទ្រ ឬរកឃើញស្រដៀងគ្នានឹងការសិក្សាមុនៗ ដែលបានអះអាងថា ការគិតវិជ្ជមាន ពិតជាមានប្រយោជន៍ចំពោះសុខភាពច្រើនណាស់។ ក្រុមអ្នកវិទ្យាសាស្រ្ដទាំងនោះ បានលើកឧទាហរណ៍ថា ទឹកកន្លះកែវ បើអ្នកមើលឃើញផ្នែកដែលមានទឹក ឬនិយាយបានថា កន្លះពេញនោះ គឺជាអ្នកគិតវិជ្ជមាន បើធៀបជាមួយអ្នកដែលមើលឃើញផ្នែកដែលអត់ទឹក។
កាលពីខែមីនាកន្លងទៅ ក្រុមអ្នកវិទ្យាសាស្រ្ដមកពីសាកលវិទ្យាល័យ Illinois សហរដ្ឋអាមេរិក បានរកឃើញថា អារម្មណ៍វិជ្ជមាន បានកាត់អ័រម៉ូនស្រ្ដេស និងពង្រឹងប្រព័ន្ធភាពស៊ាំក្នុងរាងកាយបានទៀតផង។
សរុបមកវិញ បើចង់បានអាយុវែង និងមានសុខភាពល្អ គួរធ្វើឲ្យអារម្មណ៍រីករាយ និងកុំគិតអ្វីក្នុងផ្លូវអវិជ្ជមានច្រើនពេក។ ប្រសិនបើយើង មានអារម្មណ៍តានតឹង ធុញថត់ ស្រ្ដេស និងទុទិដ្ឋិនិយមច្រើនពេក នោះវានឹងអាចនាំយើងទៅរកជំងឺផ្សេងៗ ព្រមទាំងកាត់បន្ថយអាយុរបស់យើងថែមទៀតផង។

ជាតិកាហ្វេអ៊ីន ជួយការពារជំងឺមហារីកស្បែក!

អ្នក ដែលចូលចិត្តញ៉ាំកាហ្វេ ជាពិសេសគឺស្រ្ដី នឹងអាចកាត់បន្ថយនូវហានីភ័យនៃការកើតជំងឺមហារីកស្បែកបាន បើតាមការឲ្យដឹងពីក្រុមអ្នកស្រាវជ្រាវរបស់អាមេរិក។ ការសិក្សាដែលបង្កើតឡើងដោយក្រុមអ្នកស្រាវជ្រាវមកពីសាលា Harvard School of Public Health នេះ បានរកឃើញថា អ្នកចូលចិត្តញ៉ាំកាហ្វេ ពោលគឺញ៉ាំលើសពីបីពែងក្នុងមួយថ្ងៃ អាចកាត់បន្ថយអត្រាប្រឈមមុខនឹងជំងឺមហារីកស្បែកបានចំនួន ២០ភាគរយ បើប្រៀបធៀបជាមួយអ្នកដែលញ៉ាំតិចជាងមួយពែងក្នុងមួយខែ។
ក្រុមអ្នកស្រាវជ្រាវបានធ្វើការសិក្សាទៅលើទិន្នន័យសុខភាពរបស់ មនុស្សជាង ១១ម៉ឺននាក់ ដែលមានអាយុជាមធ្យម ២៣ឆ្នាំ។ ជាលទ្ធផលបានបង្ហាញថា ស្រ្ដីដែលញ៉ាំកាហ្វេលើសពីបីពែងក្នុងមួយថ្ងៃ អាចកាត់បន្ថយហានីភ័យនៃការវិវឌ្ឍទៅរកជំងឺនេះបាន២០ភាគរយ។
ទោះបីជាយ៉ាងណាក្ដី បុរសក៏មិនសូវខុសពីស្រ្ដីប៉ុន្មានដែរ គ្រាន់តែតិចជាងប៉ុណ្ណោះ គឺអាចកាត់បន្ថយបាន ៩ភាគរយ ចំពោះអ្នកញ៉ាំលើសពីបីពែងក្នុងមួយថ្ងៃ។
សារជាតិកាហ្វេអ៊ីន ដែលមានក្នុងកាហ្វេ គឺជាធាតុផ្សំចម្បងដែលអាចការពារជំងឺមហារីកបាន បើកាហ្វេអត់ជាតិកាហ្វេអ៊ីន ក៏ឥតប្រយោជន៍នោះដែរ។

កុំផឹកស្រា បើមិនចង់កើតមហារីកសុដន់!

ស្រ្ដី ដែលផឹកស្រាតែពីកែវក្នុងមួយថ្ងៃ ក៏អាចប្រឈមមុខនឹងជំងឺមហារីកសុដន់ដល់ទៅ ៥០ភាគរយលើសអ្នកដែលមិនផឹកស្រានោះដែរ។ នេះជាលទ្ធផលនៃការស្រាវជ្រាវដ៏ធំមួយនៅសហរដ្ឋអាមេរិក ហើយមិនត្រឹមប៉ុណ្ណោះទេ សូម្បីតែផឹកត្រឹមបីទៅបួនកែងក្នុងមួយសប្ដាហ៍ ដែលមិនលើសពីអ្វីដែលក្រុមគ្រូពេទ្យបានណែនាំនោះ ក៏អាចបង្កជាហានិភ័យនោះដែរ។
ក្រុមអ្នកស្រាវជ្រាវទាំងនេះ ក៏បានធ្វើការព្រមានផងដែរ ចំពោះស្រ្ដីទាំងឡាយណាដែលផឹកស្រាជាប្រចាំនៅអាយុខ្ទង់២០ឆ្នាំ និង៣០ឆ្នាំ គឺនឹងបង្កជាផលវិបាកជាច្រើននៅពេលពួកគេចាស់ទៅ។
បើតាមការណែនាំរបស់រដ្ឋាភិបាលនៃប្រទេសមួយចំនួនបានកំណត់ថា ស្រ្ដីមិនគួរញ៉ាំស្រាលើសពី៧កែវ (កែវខ្នាតកណ្ដាល) នោះទេ ក្នុងមួយសប្ដាហ៍។ ប៉ុន្ដែការសិក្សាថ្មីនេះបានរកឃើញថា សូម្បីតែផឹកតែពាក់កណ្ដាលនេះ ពោលគឺបីទៅបួនកែវក្នុងមួយសប្ដាហ៍ក៏អាចបង្កើនហានីភ័យនៃជំងឺសាហាវ នេះចំនួណ ១៥ភាគរយផងដែរ។ ហើយចំណែកឯស្រ្ដីដែលផឹក២កែវក្នុងមួយថ្ងៃឡើងទៅ នឹងកើនកម្រិតគ្រោះថ្នាក់ដល់ទៅ ៥០ភាគរយ។
ក្រុមអ្នកស្រាវជ្រាវដែលមកពីសាកលវិទ្យាល័យ Harvard និងមន្ទីរពេទ្យស្រ្ដីនៅបូស្ដុន សហរដ្ឋអាមេរិក បានធ្វើការពិនិត្យលើទិន្នន័យសុខភាពរបស់ស្រ្ដីជាង១០ម៉ឺននាក់ ដែលមានអាយុចន្លោះពី ៣០ ទៅ៥៥ឆ្នាំ។ ក្រោយពីរយៈពេលជិត ៣០ឆ្នាំក្រោយមក ទើបចេញជាលទ្ធផលបែបនេះ ពោលគឺអ្នកផឹកពីរកែវឡើងទៅក្នុងមួយថ្ងៃ នឹងមានកម្រិតគ្រោះថ្នាក់ខ្លាំង (លើសអ្នកអត់ផឹក៥០%)។ ក្រៅពីនេះ អ្នកផឹកលើសពីមួយកែវទៅ២កែវក្នុងមួយថ្ងៃ ប្រឈមនឹងកម្រិតហានីភ័យ ២៨ភាគរយផងដែរ ខណៈដែលអ្នកផឹកតិចជាងនេះ មានកម្រិតគ្រោះថ្នាក់ ១៥ភាគរយដូចបង្ហាញខាងលើស្រាប់។
ជំងឺមហារីកសុដន់គឺជាជំងឺដែលគ្រោះថ្នាក់បំផុតមួយសម្រាប់ស្ដ្រី ដែលស្ថិតិបានបង្ហាញថា ស្រ្ដីម្នាក់ក្នុងចំណោម៨នាក់ អាចនឹងវិវឌ្ឍទៅរកជំងឺនេះក្នុងពេលណាមួយនៃជីវិតរបស់ពួកគេ។

អាហារខ្លោច បង្កជំងឺមហារីកលើសអ្វីដែលធ្លាប់បានគិត

មុននឹង អ្នកចម្អិនអាហារជាពិសេសសាច់អាំង ចូរអ្នកគិតដល់ជំងឺមហារីក ដែលនឹងអាចកើតឡើងចំពោះអ្នកប្រសិនបើសាច់ដែលអ្នកអាំងនោះខ្លោច។ មនុស្សជាច្រើនប្រហែលជាដឹងហើយថា សាច់ដែលចម្អិនខ្លោច អាចបង្កឲ្យកើតជំងឺមហារីក ប៉ុន្ដែនៅពេលនេះ ក្រុមអ្នកវិទ្យាសាស្រ្ដបានរកឃើញពីផលអាក្រក់របស់វាលើសអ្វីដែល អ្នកធ្លាប់បានដឹងនោះទៅទៀត។
ក្រុមអ្នកវិទ្យាសាស្រ្ដទាំងនោះបានបញ្ជាក់ថា ការញ៉ាំសាច់ដែលចម្អិនឆ្អិនពេក (អាំង ឬចៀន) ឬនិយាយសាមញ្ញថា ខ្លោច គឺអាចបង្កើនកម្រិតហានីភ័យនៃជំងឺមហារីកដល់ទៅពីរដងលើសអ្វីដែល ធ្លាប់គិតកាលពីមុន។
ការស្រាវជ្រាវកាលពីមុនដែលយកសត្វកណ្ដុរមកធ្វើពិសោធន៍នោះ បានរកឃើញពីហានីភ័យនៃជំងឺមហារីកចំពោះអាហារខ្លោច ប៉ុន្ដែនៅពេលនេះ ការសិក្សាថ្មីបំផុតមួយដែលធ្វើឡើងដោយក្រុមអ្នកស្រាវជ្រាវមកពី វិទ្យាស្ថាន Norwegian Institute of Public Health បានរកឃើញថា កណ្ដុរមិនមានអង់ហ្ស៊ីម soltfotransferases នៅពេញខ្លួនដូចមនុស្សនោះទេ ពោលគឺមានតែនៅក្នុងថ្លើមប៉ុណ្ណោះ។ អង់ហ្ស៊ីមប្រភេទនេះ គឺអាចធ្វើឲ្យផលប៉ះពាល់នៅក្នុងអាហារថយចុះ ប៉ុន្ដែវាក៏អាចបង្កើនផលប៉ះពាល់បានផងដែរក្នុងករណីខ្លះ។
ក្រុមអ្នកស្រាវជ្រាវថ្មីនេះបានធ្វើការចាក់បញ្ចូលនូវអង់ ហ្ស៊ីមនេះទៅក្នុងសត្វកណ្ដុរ ដើម្បីដឹងពីភាពខុសគ្នានៃកម្រិតហានីភ័យ។ ជាលទ្ធផលបានបង្ហាញថា ហានីភ័យបានកើនពី ៣១ភាគរយក្នុងការសិក្សាលើកមុន មកដល់ ៨០ភាគរយ។
កណ្ដុរដែលត្រូវបានចាក់បញ្ចូលអង់ហ្ស៊ីមដូចមនុស្សបានទទួលហានីភ័យ ខ្ពស់ដល់ទៅ ៨០ភាគរយ ក្នុងការវិវឌ្ឍទៅរកជំងឺមហារីក។
លទ្ធផលនេះបានបង្ហាញថា មនុស្សដែលញ៉ាំសាច់ខ្លោច អាចនឹងប្រឈមមុខនឹងជំងឺមហារីកដល់៨០ភាគរយឯណោះ មិនមែនតែ ៣១ភាគរយ ដូចអ្វីដែលយើងធ្លាប់ដឹងកន្លងមកនោះទេ។
មិនត្រឹមតែប៉ុណ្ណោះទេ នេះក៏ជាសញ្ញាថ្មីមួយដែលបង្ហាញថា ការយកកណ្ដុរធម្មតា មកធ្វើពិសោធន៍គឺមិនសូវជាល្អប៉ុន្មាននោះទេ ពោលគឺពុំសូវត្រូវពេលយកមកប្រៀបធៀបជាមួយមនុស្ស។
សរុបមកវិញ ការចម្អិនអាហារជាពិសេសគឺសាច់ គឺត្រូវធ្វើឲ្យត្រឹមត្រូវ គឺឆៅពេកក៏មិនល្អ ឆ្អិនពេករហូតខ្លោចក៏មិនល្អនោះដែរ។

អាហារ៨យ៉ាងការពារមហារីកសុដន់!

ជំងឺ មហារីកសុដន់ គឺជាជំងឺដែលស្រ្ដីនៅទូទាំងពិភពលោកខ្លាចបំផុត។ ប្រសិនបើមិនព្យាបាលទាន់ពេលវេលាទេ វានឹងរីករាលដាលពីសុដន់ ទៅកាន់ផ្នែកផ្សេងទៀតនៃរាងកាយ។
ជំងឺនេះជាប្រភេទជំងឺមហារីកមួយប្រភេទដែលកើតច្រើនបំផុត សម្រាប់ស្រ្ដី ដោយមិនប្រកាន់ពូជសាសន៍ ពណ៌សម្បុរ ឋានៈសង្គម មាន ក្រ អ្វីនោះឡើយ ដែលជាមធ្យមម្នាក់ក្នុងចំណោម១០០នាក់ នឹងប្រឈមនឹងជំងឺនេះម្ដងក្នុងមួយជីវិតរបស់ពួកគេ។
មូលហេតុនេះជំងឺនេះ រួមមាន ប្រវត្តិគ្រួសារធ្លាប់មានអ្នកកើតជំងឺនេះ និងហ្សែន ប៉ុន្ដែទន្ទឹមនឹងកត្តាហានីភ័យនេះ វាក៏មានវិធីកាត់បន្ថយកម្រិតគ្រោះថ្នាក់បានផងដែរ។ ខាងក្រោមនេះគឺជាប្រភេទអាហារ៨យ៉ាង ដែលអាចជួយលោកអ្នកជៀសផុតពីជំងឺមហារីកសុដន់បាន៖
១- តែបៃតង
តែបៃតង មានអត្ថប្រយោជន៍សុខភាពជាច្រើន ដែលក្នុងនោះក៏មានសារធាតុប្រឆាំងនឹងមហារីកផងដែរ។ វាមានប្រសិទ្ធិភាពខ្ពស់ក្នុងការការពារការរីកលូតលាស់នៃជំងឺនេះ យ៉ាងមានប្រសិទ្ធិភាព។
២- អាហារស្លឹកបៃតងចាស់
អាហារដែលមានស្លឹកពណ៌បៃតងចាស់ ដូចជាស្ពៃក្ដោប ខាត់ណា ប្រូកូលី គឺមានផ្សំទៅដោយសារធាតុប្រឆាំងអុកស៊ីតកម្មដ៏ខ្លាំងក្លា ដែលមានឈ្មោះថា indole-3-carbinol ដែលជួយទប់ស្កាប់មិនឲ្យមេរោគរីកលូតលាស់បាន។
ទោះយ៉ាងណាក្ដី ការចម្អិនឆ្អិនពេក កម្ដៅក្ដៅពេក គឺអាចកាត់បន្ថយគុណភាពរបស់បន្លែទាំងអស់នេះបាន។
៣- ខ្ទឹមស
សារធាតុ Sulphur ដែលមាននៅក្នុងខ្ទឹមស អាចមានប្រសិទ្ធិភាពខ្លាំងក្នុងការការពារប្រឆាំងនឹងមហារីកសុដន់ បាន។ ការសិក្សាជាច្រើនបានបង្ហាញថា ស្រ្ដីដែលញ៉ាំខ្ទឹមស យ៉ាងតិចម្ដងក្នុងមួយសប្ដាហ៍ មានអត្រាទាបក្នុងការកើតជំងឺនេះ។
៤- ខ្លាញ់ត្រី
ខ្លាញ់ដែលនៅក្នុងត្រី មានការផ្សារភ្ជាប់ទៅនឹងការថយចុះនៃជំងឺមហារីកសុដន់។ ខ្លាញ់ត្រី មានផ្សំទៅដោយ Omega-3 ដែលជួយទប់មិនឲ្យមេរោគនៃជំងឺនេះរីកដុះដាលបាន និងជួយជម្រុញកម្រិតឈាមហូរបានទៀតផង។
៥- ប៉េងប៉ោះ
ប៉េងប៉ោះ គឺជាអាវុធដែលអាចវាយប្រហារជំងឺមហារីកសុដន់បាន។ ប៉េងប៉ោះមានផ្សំទៅដោយ lycopene ដែលជាសារធាតុប្រឆាំងប្រឆាំងអុកស៊ីតកម្មដែលអាចទប់ទល់មហារីកបាន ។
៦- ផ្សិត
ផ្សិតគឺជាំអាហារដ៏ពេញនិយមមួយ ហើយវាក៏ជាភ្នាក់ងារប្រឆាំងនឹងមហារីកផងដែរ។ វាមានសារធាតុដែលអាចជួយកាត់បន្ថយកម្រិតហានីភ័យនៃការវិវឌ្ឍទៅរក ជំងឺមហារីកសុដន់។
សរុបមកវិញ ការការពារ គឺជាកូនសោរមួយដ៏សំខាន់។ ដូច្នេះត្រូវការពារ ប្រសើរជាងព្យាបាល។

ហេតុអ្វីបុគ្គលិកការិយាល័យប្រឈមជំងឺមហារីក?

ក្រុម អ្នកជំនាញបានធ្វើការព្រមានថា បុគ្គលិកការិយាល័យគឺជាអ្នកដែលប្រឈមមុខនឹងហានីភ័យនៃការកើតជំងឺ មហារីក។ តើហេតុអ្វីបានជាដូច្នេះ? ចម្លើយយ៉ាងខ្លី គឺដោយសារបុគ្គលិកទាំងនោះជាអ្នកនៅអង្គុយក្នុងរយៈពេលយូរ។ បុគ្គលិកការិយាល័យ ដែលអង្គុយនៅនឹងកន្លែងយូរ គឺអាចបង្កើនកម្រិតគ្រោះថ្នាក់នៃការវិវឌ្ឍទៅរកជំងឺមហារីកពោះវៀន និងមហារីកសុដន់។
លទ្ធផលនៃការសិក្សាដែលត្រូវបានប្រកាសនៅក្នុងសន្និបាទប្រចាំ ឆ្នាំនៃវិទ្យាស្ថានស្រាវជ្រាវមហារីកអាមេរិកាំង បានបង្ហាញពីទំនាក់ទំនងយ៉ាងខ្លាំងក្លានៃការអង្គុយនៅនឹងកន្លែង ខ្វះសកម្មភាព ជាមួយនឹងការរីកលូតលាស់នៃកោសិកាមហារីក។ ក្រុមអ្នកវិទ្យាសាស្រ្ដទាំងនោះ បានជឿជាក់ថា ការអង្គុយនេះហើយ ដែលបានបង្កឲ្យមានជំងឺមហារីកចំនួន ៩២០០០ករណី ជារៀងរាល់ឆ្នាំ។
ដោយមានពន្លឺពីលទ្ធផលនៃការស្រាវជ្រាវនេះ ក្រុមអ្នកជំនាញខាងសុខភាពបានទាមទារឲ្យមនុស្សជៀសវាងការអង្គុយលើ កៅអី ឬសាឡុងយូរពេក ពោលគឺក្រោកឡើងបញ្ចេញសកម្មភាពខ្លះប្រសិនបើអាចឆ្លៀតបាន។ ក្រុមអ្នកជំនាញទាំងនោះ បានសំណូមពរឲ្យអ្នកដែលអង្គុយយូរៗ ធ្វើការហាត់ប្រាណ២នាទី ជារៀងរាល់មួយម៉ោងម្ដង ក្នុងមួយថ្ងៃនៅក្នុងម៉ោងដែលពួកគេធ្វើការ។
ការហាត់ប្រាណដែលល្អបំផុត និងងាយស្រួល គឺអ្នកគ្រាន់តែដើរតែប៉ុណ្ណោះ ក៏អាចកាត់បន្ថយកម្រិតលូតលាស់នៃសារធាតុដែលបង្កជំងឺមហារីកបានផង ដែរ។
ការសិក្សាផ្សេងទៀត ក៏បានរកឃើញស្រដៀងគ្នានេះដែរ ពោលគឺបុគ្គលិកការិយាល័យដែលអង្គុយយូរៗ ប្រឈមនឹងជំងឺមហារីកបើទោះបីជាឆ្លៀតពេលហាត់ប្រាណក៏ដោយ។

អ្នក ប្រហែលជាភ្លាប់បានឃើញក្មេងៗនៅតាមទីជនបទខ្លះ រត់លេងដី មិនទាំងពាក់ស្បែកជើងផង ប៉ុន្ដែក្មេងទាំងនោះមើលទៅទ្រលុកទ្រលន់ ហើយធន់នឹងជំងឺល្មមៗបានទៀតផង។ តើនេះមកពីអ្វី?
ក្រុមអ្នកស្រាវជ្រាវបានរកឃើញថា ថ្វីត្បិតតែការលេងភក់ដ៏គគ្រិច ឬលេងដីកខ្វក់របស់ក្មេងតូចៗ បានធ្វើឲ្យឪពុកម្ដាយពួកវាមិនសប្បាយចិត្ដ ប៉ុន្ដែទង្វើរបស់ក្មេងៗទាំងនោះ គឺស្មើនឹងការពង្រឹងភាពស៊ាំនឹងជំងឺរបស់ពួកគេទៅវិញ។
យោងតាមការរកឃើញនៅក្នុងការសិក្សាថ្មីនេះ បានឲ្យដឹងថា កុមារដែលប៉ះពាល់នឹងប្រភេទបាក់តេរីជាច្រើនផ្សេងៗគ្នា មានប្រព័ន្ធភាពស៊ាំប្រសើរជាងកុមារដែលស្អាតបាត មិនដែលប៉ះពាល់ដីបន្ដិចណាសោះនោះ។ ពួកគេនឹងមានការការពារប្រសើរនៅពេលពួកគេធំឡើង។
ទោះយ៉ាងណាក្ដី ឪពុកម្ដាយនៅសម័យនៃមានការយល់ដឹងច្រើនពីវិធីរស់នៅប្រកបដោយ អនាម័យ ដូច្នេះពួកគេប្រាកដជាមិនបណ្ដោយឲ្យកូនៗជាទីស្រលាញ់ ទៅលេងភក់ ឬដីនោះទេ។ ប៉ុន្ដែភាពអនាម័យជ្រុលទាំងនោះ បានធ្វើឲ្យកេ្មងជាច្រើនទទួលរងនូវ allergy ជាច្រើនប្រភេទផងដែរ (ជាមធ្យមម្នាក់ក្នុងចំណោមបួននាក់បានរងគ្រោះដោយ Allergy)។
ការសិក្សានេះធ្វើឡើងដោយក្រុមអ្នកស្រាវជ្រាវមកពីសាកលវិទ្យាល័យ Copenhagen។ ពួកគេបានសិក្សាទៅលើកុមារចំនួន ៤១១នាក់ អស់រយៈពេល១២ឆ្នាំ ចាប់តាំងពីទារកចាប់កំណើតឡើង ទម្រាំចេញជាលទ្ធផលនេះ។

អាហារឆ្អិន ផ្ដល់ថាមពលជាងអាហារឆៅ!

សុខ សុវត្ថិ សុខភាព និងស្នេហា

ក្រៅ ពីផ្ដល់នូវរសជាតិឈ្ងុយឆ្ងាញ់ អាហារចម្អិន ដែលមានទាំងសាច់ និងបន្លែ បានផ្ដល់ឲ្យរាងកាយយើងនូវថាមពលច្រើនជាងសាច់ និងបន្លែដែលឆៅ នេះបើយោងតាមការសិក្សាថ្មីមួយរបស់អាមេរិក។
យោងតាមក្រុមអ្នកជំនាញទាំងនោះ បានឲ្យដឹងថា អាហារដែលចម្អិនឆ្អិន អាចជួយបង្កើននូវអត្ថប្រយោជន៍ដល់រាងកាយទាំងមូល ក៏ដូចជាខួរក្បាលរបស់យើង ហើយក៏ជួយបង្កើនថាមពលដល់អ្នកដែលបញ្ចេញសកម្មភាពច្រើន ដូចជាអ្នករត់ក្នុងចម្ងាយឆ្ងាយជាដើម។
ការសិក្សានេះត្រូវបានដឹកនាំធ្វើឡើងដោយលោក Rachel Carmody អ្នកជីវសាស្រ្ដប្រចាំសាលា Harvard's Graduate School of Arts and Sciences សហរដ្ឋអាមេរិក រួមនឹងសហការីរបស់លោក។
លទ្ធផលនៃការស្រាវជ្រាវនេះ គឺបានបង្ហាញយ៉ាងច្បាស់ថា យើងម្នាក់ៗគួរតែញ៉ាំអាហារដែលឆ្អិន ជាជាងញ៉ាំអាហារដែលនៅឆៅ ដោយសារតែមិនត្រឹមតែល្អចំពោះសុខភាពប៉ុណ្ណោះទេ ប៉ុន្ដែថែមទាំងជួយបង្កើតកម្រិតថាមពលក្នុងរាងកាយបានទៀតផង។ ទោះបីជាយ៉ាងណាក្ដី ការរកឃើញនេះ ក៏បានបង្ហាញដែរថា អាហារឆ្អិនអាចធ្វើឲ្យយើងឡើងទម្ងន់ផងដែរ។
លោកសាស្រ្ដាចារ Richard Wrangham ដែលជាអ្នកស្រាវជ្រាវម្នាក់ដែរនោះ បានបញ្ជាក់ដែរថា នេះគឺជាលើកដំបូងហើយ ដែលយើងអាចដឹងចម្លើយច្បាស់ ថាហេតុអ្វីបានជាយើងត្រូវញ៉ាំអាហារដែលឆ្អិន។ ហេតុផលចាំបាច់បំផុតនោះ គឺវាបានផ្ដល់ឲ្យយើងនូវថាមពល ជួយបង្កើនថាមពល ដែលថាមពលនេះហើយ ដែលជីវិតមនុស្សម្នាក់ៗត្រូវការ។

Social Icons

Pages

Popular Posts

Followers

About Me

Social Icons

Total Pageviews

Labels

Blog Archive