 |
| ស្រ្ដីមានផ្ទៃពោះនិយាយទូរសព្ទ |
មូលហេតុដែលគេដឹងថា ទារកក្នុងស្បូន ទទួលផលប៉ះពាល់អវិជ្ជមានពីទូរសព្ទដៃ គឺដោយសារតែក្រុមអ្នកស្រាវជ្រាវបានធ្វើការសិក្សាទៅលើកណ្ដុរដែល មានកូនក្នុងពោះ។
ពួកគេបានចង្អុលបង្ហាញថា កូនកណ្ដុរដែលមិនទាន់កើត បានទទួលនូវជាតិវិទ្យុសកម្ម ពីទូរសព្ទដៃ។ លទ្ធផលពីការសិក្សាលើសត្វកណ្ដុរ អាចឲ្យគេសន្និដ្ឋានបានថា ស្រ្ដីដែលមានផ្ទៃពោះ គួរតែដាក់ទូរសព្ទដៃនៅឲ្យឆ្ងាយពីខ្លួនយ៉ាងតិចមួយម៉ែត្រ។
ចំណែកឯក្រុមអ្នកជំនាញដែលមកពីសាកលវិទ្យាល័យ University College of London វិញ បានជំទាស់ចំពោះការយកការសិក្សាលើសត្វកណ្ដុរ មកធៀបនឹងមនុស្ស ព្រោះថាកណ្ដុរគឺពរពោះតែ ១៩ថ្ងៃប៉ុណ្ណោះ ដែលខួរក្បាលរបស់កូនកណ្ដុរ ក៏មានការវិវឌ្ឍខុសប្លែកពីទារកក្នុងផ្ទៃផងដែរ។
ទោះបីជាមានការមិនឯកភាពគ្នារវាងក្រុមអ្នកជំនាញបែបនេះក៏ ដោយ ប៉ុន្ដែលទ្ធផលនៃការសិក្សាស្រាវជ្រាវកាលពីពីរឆ្នាំមុន របស់សាកលវិទ្យាល័យ University of California នៅឡូស អ៊ែនជើលែស ក៏បានរកឃើញពីផលប៉ះពាល់របស់ទូរសព្ទដៃ ចំពោះស្រ្ដីមានផ្ទៃពោះផងដែរ។ ពួកគេបានរកឃើញថា ទារកដែលទទួលជាតិវិទ្យុសកម្មពីទូរសព្ទដៃ បានបង្កើនហានីភ័យ ៣០ភាគរយ ក្នុងការជួបប្រទះនូវបញ្ហាអាកប្បកិរិយានៅពេលមានអាយុ៧ឆ្នាំ។ កាលពីពេលនោះ គឺមិនមែនធ្វើការសិក្សាលើសត្វកណ្ដុរនោះទេ ប៉ុន្ដែគឺជាសិក្សាលើកុមារ ២៩០០០នាក់។ ទោះបីជាយ៉ាងណាក្ដី កាលពីគ្រានោះក៏មានការជំទាស់ពីក្រុមអ្នកវិទ្យាសាស្រ្ដ របស់អង់គ្លេសផងដែរ ដោយលើកឡើងថា បញ្ហាអាកប្បកិរិយារបស់កុមារ មិនមែនមកពីទូរសព្ទដៃនោះទេ គឺដោយសាររបៀបនៃការរស់នៅរបស់ពួកគេ។