ប្រជាជនខ្មែរជាពិសេសក្មេងៗ ដែលនៅតាមបណ្តាខេត្តនានាដែលមានទីវាលធំទូលាយតែងចូលចិត្តបង្ហោះ ខ្លែងលែងនៅពេលទំនេរ។ ការបង្ហោះខ្លែងនេះក៏មានទំនាក់ទំនងទៅនឹងជំនឿរបស់ប្រជាជនខ្មែរយើង ផងដែរ ទាំងព្រះមហាក្សត្រ ទាំងប្រជាជនសាមញ្ញ។ គេតែងមានជំនឿតៗគ្នាថា ការបង្ហោះខ្លែងគឺធ្វើឡើងដើម្បីគោរពបូជាដល់សាសនាធំៗពីរ គឺព្រហ្មញ្ញសាសនា និព្រះពុទ្ធសាសនា។
១- បង្ហោះខ្លែងបូជាព្រហ្មញ្ញសាសនា៖
ការបង្ហោះខ្លែងនេះត្រូវបានគេជឿថាធ្វើឡើងដើម្បីគោរពដល់ព្រះ អាទិទេពជាច្រើនដូចជា ព្រះសិវៈ ព្រះវិស្ណុ ព្រះព្រហ្ម ។ល។ ក្រៅពីនេះនៅមានព្រះអាទិទេពបន្ទាប់បន្សំផ្សេងៗទៀតដូចជា ព្រះចន្ទ ព្រះពាយ ព្រភារុណ ព្រះធរណី ព្រះអគ្គី ជាដើម។
ពិធីបង្ហោះខ្លែងតែងតែធ្វើឡើងដើម្បីជាកិច្ចគោរពដឹងគុណ ព្រះពាយ ដែលផ្តល់អោយខ្យល់សម្រាប់ដកដង្ហើមបានរស់រានមានជីវិតគ្រប់ៗគ្នា ដែលគេនិយមហៅថាដង្ហើមរស់។
២- បង្ហោះខ្លែងបូជាព្រះពុទ្ធសាសនា៖
សម្រាប់ជំនឿទៅលើការបង្ហោះខ្លែងនៅក្នុងព្រះពុទ្ធសាសនាវិញ ពិធីបង្ហោះខ្លែងនេះគឺជាពិធីមួយសម្រាប់បូជាដល់ព្រះចូឡាមណីចេតិយ ដែលប្រតេដ្ឋាននៅវិមានត្រៃត្រឹង្ស។
ខ្មែរយើងមានជំនឿថា ប្រសិនបើខ្លែងធ្លាក់លើផ្ទះនោះ គេចាត់ទុកថាចង្រៃណាស់។ ប្រសិនបើមានហេតុការណ៍ដូចនេះកើតឡើង ម្ចាស់ផ្ទះទាមទារអោយម្ចាស់ខ្លែងធ្វើពិធីបង្កក់ប្រសិទ្ធិ លើករាសីអោយគេ។
ដកស្រង់ចេញពី៖ សៀវភៅវិញ្ញាសា វប្បធម៌ទូទៅ របស់លោក ប៉ែន ពុទ្ធសភា ឆ្នាំ ២០០៦