អ្នកញ៉ាំច្រើន
ការស្រាវជ្រាវនេះធ្វើឡើងចំពោះមនុស្សវ័យចំណាស់ ដែលមានអាយុ ៧០ឆ្នាំ ទៅ៨៩ឆ្នាំ ដែលក្នុងនោះក៏មានមនុស្សដែលកើតជំងឺភ្លេចភ្លាំង ១៦៣នាក់ផងដែរ។ អ្នកចូលរួមទាំងអស់នេះ តម្រូវឲ្យពណ៌នាពីរបបអាហារប្រចាំថ្ងៃរបស់ពួកគេ ក្នុងរយៈពេលមួយឆ្នាំ។
ក្រោយពីធ្វើការសាកសួររួចមក គឺបានបែងចែកជាបី ពោលគឺមួយភាគបីនៃអ្នកចូលរួមទាំងអស់ ដែលញ៉ាំពី ៦០០កាឡូរី ទៅ ១៥២៦កាឡូរី ក្នុងមួយថ្ងៃ, ១ភាគបី ញ៉ាំពី ១៥២៦កាឡូរី ទៅ ២១៤៣កាឡូរី និងមួយភាគបីទៀត ដែលញ៉ាំពី ២១៤៣កាឡូរី ទៅ ៦០០០កាឡូរី ក្នុងអំឡុងពេលនៃការស្រាវជ្រាវ។ ការស្រាវជ្រាវនេះ ក៏ធ្វើការត្រួតពិនិត្យលើកត្តាផ្សេងទៀតផងដែរ ដែលរួមមាន អាយុ ភេទ កម្រិតនៃការអប់រំ ប្រវត្តិនៃជំងឺស្រ្ដូក និងអារម្មណ៍ធុញថប់។
ជាលទ្ធផលបានបង្ហាញថា អ្នកដែលញ៉ាំអាហារក្នុងបរិមាណច្រើនជាងគេ គឺពី ២១៤៣កាឡូរី ទៅ ៦០០០កាឡូរីក្នុងមួយថ្ងៃ មានការកើនឡើងហានីភ័យនៃជំងឺភ្លេចភ្លាំងដល់ទៅ ២ដង។ ហានីភ័យនេះ នឹងកាន់តែកើនឡើងខ្លាំង នៅពេលដែលកាឡូរីដែលយើងញ៉ាំ កាន់តែច្រើន។
ទោះបីជាការស្រាវជ្រាវនេះ ធ្វើឡើងតែចំពោះមនុស្សវ័យចំណាស់ក៏ពិតមែន ប៉ុន្ដែវាក៏មិនខុសគ្នាចំពោះមនុស្សពេញវ័យដទៃទៀតដែរ។ ចូរញ៉ាំអាហារឲ្យបានត្រឹមត្រូវ ក្នុងបរិមាណសមស្រប ពោលគឺមិនតិចពេក និងមិនច្រើនពេក ដើម្បីសុខភាពនៃយើងទាំងអស់គ្នា។