ការសើចដែលចេញពីចិត្ត
នៅក្នុងការសិក្សានេះ លោកសាស្រ្ដាចារ្យ Michael Miller និងសហការីរបស់គាត់ បានធ្វើចាប់តាំងពីជាង១០ឆ្នាំមុនមកម្លេះ ហើយបានធ្វើការស្ទង់មតិទៅលើមនុស្ស ៣០០នាក់ ទាំងមាន និងគ្មានជំងឺបេះដូង។
ក្រោយពីធ្វើការសិក្សាអស់រយៈពេលជាយូររួចមក ក្រុមអ្នកស្រាវជ្រាវទាំងនេះបានរកឃើញថា អ្នកដែលចូលចិត្តមើលរឿងបែបរន្ធត់ ឬរឿងដែលស្រ្ដេស គឺមានសុខភាពមិនសូវល្អ ដោយសារតែការបន្ថយប្រព័ន្ធឈាមរត់។ ចំណែកឯក្រុមអ្នកដែលមើលរឿងបែបកំប្លែងវិញ មានភាពប្រសើរជាង ដោយសារតែសរសៃឈាមបានដំណើរការបានយ៉ាងល្អ។
ក្រោយពីវិភាគរួចមក ក្រុមរបស់លោក Miller បានរកឃើញថាមានភាពខុសគ្នានៃដំណើរឈាមរត់រវាង អ្នកដែលសើច និងអ្នកដែលមានអារម្មណ៍ស្រ្ដេសចំនួន ៣០ ទៅ៥០%។
មិនត្រឹមតែមានប្រយោជន៍ចំពោះបេះដូងប៉ុណ្ណោះទេ ក្រុមអ្នកស្រាវជ្រាវក៏បានបញ្ជាក់ដែរថា ការសើចគឺមានប្រយោជន៍ចំពោះសុខភាពខ្លាំងណាស់។ ទោះបីជាយ៉ាងណាក៏ដោយ ការសិក្សាផ្សេងទៀត នឹងត្រូវធ្វើឡើង ដើម្បីដឹងឲ្យកាន់តែច្បាស់ពីទំនាក់ទំនងនៃការសើច ជាមួយនឹងសុខភាពបេះដូង។