អ្នកវិទ្យាសាស្រ្ដរបស់អាមេរិកចំនួន ១៣នាក់ ដែលធ្វើការស្រាវជ្រាវលើរឿងនេះ បានបញ្ជាក់ថា មិនមានការរកឃើញភស្ដុតាងណាមួយ ដែលគាំទ្រឲ្យការលើកឡើងថាជំងឺមាត់ធ្មេញ បង្កជាជំងឺបេះដូងនោះទេ។ ការបញ្ជាក់បែបនេះ គឺដោយសារតែក្រុមអ្នកវិទ្យាសាស្រ្ដទាំងនេះ បានធ្វើការសិក្សាលើអត្ថបទចំនួន ៥០០ ដែលបោះពុម្ភផ្សាយក្នុងព្រឹត្តបត្រវិទ្យាសាស្រ្ដ។
ការរកឃើញថ្មីនេះ នឹងអាចឈានទៅដល់ការជំទាស់ផ្សេងទៀត ដោយសារតែវាជាប្រធានបទដែលមិនទាន់មានការឯកភាពគ្នា។ លោកសាស្រ្ដាចារ្យ Peter Lockhart ដែលជាអ្នកជំនាញខាងមាត់ធ្មេញ មកពី North Carolina បានលើកឡើងថា ប្រសិនបើមានភាពទាក់ទងគ្នារវាងជំងឺមាត់ធ្មេញ និងជំងឺបេះដូងមែននោះ ប្រាកដជាមានការរកឃើញភស្ដុតាងអ្វីមួយមិនខាន តែមកទល់ពេលនេះ គឺនៅតែមិនមានដដែល។
សរុបមកវិញ ការរកឃើញថ្មីនេះ បានបង្ហាញថា ជំងឺមាត់ធ្មេញ ឬមាត់ធ្មេញមិនស្អាត មិនមែនជាកត្តាបង្កជាជំងឺបេះដូង ដូចការលើកឡើងនាពេលកន្លងមកទេ។ យ៉ាងណាក្ដី នេះគ្រាន់តែជាការស្រាវជ្រាវប៉ុណ្ណោះ ធាតុពិតយ៉ាងណានោះ នឹងត្រូវបង្ហាញ នៅពេលដែលភស្ដុតាងជាក់លាក់ត្រូវបានរកឃើញ។